Tiô Khu xiâm ngăn pro hnoăng mơhá kong pơlê Dak Nông, luâ 9 khế, tâi tâng kơxô̆ liăn nâp hnoăng mơhá châ 1962 rơtal liăn, tơ‘mô ƀă 66,4% tiô tíu xiâm pơcháu ƀă tơ’mô 75,8% tâng vâ pơchông ƀă hơnăm nah. Kơxô̆ liăn ngân hơnăm kố kơdroh hên xua tơdjâk dêi hên tơdroăng.

Tung mê, kong pơlê dế tơbleăng pêi hên troăng rơhlâ kơdroh pro hnoăng mơhá vâ mâu khu mơdró ‘mâi mơnhông cheăng tê mơdró. Krê tơdroăng xăm 50% hnoăng mơhá rak vế hyôh kong prâi, hiăng pro kơdroh 100 rơtal liăn ki xo ing nâp dêi 9 khế. Tơdrêng amê, luât pơkâ kơdroh 30% hnoăng mơhá tơnêi dêi hơnăm 2022, tơdroăng kơdroh hnoăng mơhá mâu tơmeăm hiăng pro kơdroh kơxô̆ liăn xo ing nâp 120 rơtal liăn.

Malối, tơdroăng tê mơdró tơnêi hngêi trăng dế rơhĭng, tơdroăng pơ’lêh pơcháu tơnêi tung kong pơlê dế ôh tá hên pro kơdroh kơxô̆ liăn xo ing nâp ‘na tơnêi tơnêi dêi kong pơlê. Mê cho, tung 9 khế , kơxô̆ liăn xo ing xúa tơnêi bú dâng 246 rơtal liăn, tơ ‘mô ƀă 28,4% tiô tối hdrối dêi kong pơlê, tơ‘mô ƀă 41,5% tâng vâ pơchông ƀă hơnăm nah.

Kơvâ pro hnoăng mơhá kong pơlê Dak Nông dế mơ-eăm tơbleăng mâu troăng rơhlâ boăng a mâu kơxô̆ liăn xo, tơniăn kơxô̆ liăn xo nâp ăm hngêi rak liăn ngân tơnêi têa  hơnăm 2023 tiô pơkâ.