VOV4.Xơ Đăng - Tơdroăng ‘’Tŏng kum ro’’ xua Khu lo tŏng veăng pơlê kong kơdrâm Ƀuôn Ma Thuột, kong pơlê Dak Lak tơbleăng tung mâu hơnăm hdrối mê hía nah hiăng pro ai pơxúa tơƀrê drêng veăng kum hên rơpŏng mơ-eăm hluăn ing kơtiê.

Hơnăm 2017, nâ H’Râu H’Đơk a Ƀuôn Ky, bêng Thành Nhất, pơlê kong kơdrâm Ƀuôn Ma Thuột, kong pơlê Dak Lak châ khu lo tŏng veăng kum ăm môi to ro kơdrâi. Troh nôkố, ro kăn hiăng ai kuăn châ péa to. Nếo achê kố, nâ hiăng tê dêi ro kuăn kơnốu châ lối 15 rơtuh xo liăn pro kơdroăng păn chu. Ƀă kuăn ro kơdrâi ki kŭn nâ pơ’lêh ăm rơpŏng xơpá ki ê păn. Nâ H’Râu H’Đơk tối: cheăng kâ rế hía rế tơniăn, hơnăm nah, rơpŏng nâ pâ lo ing rơpŏng kơtiê.

“Mơnê Khu lo tŏng veăng pơlê kong kơdrâm hiăng ăm á ro păn nôkố rơpŏng hiăng chía niân. Rơpŏng á kô pơtối vêh păn roăng, ăm gá ai kuăn, maluâ trâm hên xơpá xuân athế mơ-eăm”.

Khu lo tŏng veăng pơlê kong kơdrâm Ƀuôn Ma Thuột séa ngăn túa păn ro kăn

Klêi kơ’nâi khế hơnăm păn roăng, kuăn ro dêi rơpŏng nâ H’Phiết Niê, a ƀuôn K’Mrơng Prong A, cheăm Ea Tu, pơlê kong kơdrâm Ƀuôn Ma Thuột xuân hiăng ai kuăn. Nâ H’Phiết ăm ‘nâi:

“Ro ki kố cho ro tơnêi têa ăm, hngêi á xơpá khât mê vâi ăm á kuăn ro vâ păn, hngêi á ối tung rơpŏng kơtiê, hngêi ối xuân ôh tá ai, nôkố ai 1 to ro, drêng ro ai kuăn á ro khât, tơnêi têa ăm kuăn mê nôu păn, nôu roăng”.

Hên rơpŏng kơtiê hiăng tơkâ luâ xơpá kơnôm ing păn ro ai kuăn

Jâ Phạm Khánh Quyên, Kăn hnê ngăn Khu lo tŏng veăng pơlê kong kơdrâm Ƀuôn Ma Thuột, kong pơlê Dak Lak, ăm ‘nâi, tung to lâi hơnăm nah, khu hiăng hbru 50 to rokăn kum mâu rơpŏng ki xơpá, ki hên cho hdroâng kuăn ngo, ai troăng mơnhông mơdêk cheăng kâ. Túa pêi kố châ po rơdâ tiô tơdroăng, tung pơla ro ai kuăn, rơpŏng ki tơdah xo ro kô pơcháu môi to kuăn ro kơdrâi ăm rơpŏng ki ê păn. Vâ ro kố xông kân tơƀrê, pơlê kong kơdrâm hiăng tơrŭm ƀă kơvâ pơlât mơnăn tơkŭm hnê hriâm kih thuât păn ro ăm kuăn pơlê.

“Túa pơkâ kố hiăng kum hên ngế. Ki hên cho mâu rơpŏng châ kum ai mâu rơpŏng kơtiê hiăng mơ-eăm chiâng rơpŏng vâ chê kơtiê, ƀă mâu rơpŏng ki vâ chê kơtiê hiăng hluăn ing kơtiê. Mâu rơpŏng ki mê nôkố mơnhông mơdêk cheăng kâ, ƀă va chê hiăng ai tŭm hmê kâ, ếo xâp, ôh tá tơkôm xếo tung tơdroăng tŏng kum dêi Tơnêi têa. Tơƀrê dêi Tơdroăng tŏng kum ro kố xuân dế pơtối châ rak vế ƀă rêm râ hô̆i xuân dế séa ngăn.

Rêm khế pơlê kong kơdrâm Khu lo tŏng veăng xuân pơtroh kăn ƀô̆ troh vâ séa ngăn hnê ăm mâu rơpŏng kơtiê ki u ối”.

Tuấn Anh chêh

Katarina Nga tơplôu ƀă tơbleăng