Khế 2/1975, Đăi tươ̆ng Văn Tiến Dũng, teăng mâ Đảng lêng Tơnêi têa, tơbleăng pơkâ mơjiâng Khu xiâm pơkuâ lêng tơplâ Tây Nguyên, ƀă Trung tươ̆ng Hoàng Minh Thảo pro Kăn pơkuâ lêng ƀă Đăi tă Đặng Vũ Hiệp pro Chính ủy. Khu xiâm mơnhên Tây Nguyên cho tíu ki xiâm, tíu ki kal mơhnhôk ivá tâi tâng ‘na kế tơmeăm khoăng ƀă hiâm mơno. Hên hĭn mâu sư đoân ki xiâm hiăng châ pơtroh troh kơpong kố, ai mâu sư đoân 320, 316, 968, ƀă 10, rơtế ƀă tơdroăng tơrŭm dêi hên lêng ki ê môi tiah lêng kơnŏng, lêng cheăng ƀă lêng vê rơplâ ƀă rơxế komƀa. Kố cho khu lêng ki rơdêi châ hbrâ i nhên vâ pêi pro tơdroăng tơplâ.

Trung tươ̆ng, ngế khên tơnôu khu lêng tơplâ Khuất Duy Tiến, Kăn pơkuâ ƀơrô tơplâ, Tơdroăng tơplâ Tây Nguyên tối ăm ‘nâi, tơdrêng khu lêng tơleăng lĕm tơkŭm troh lâp lu khu lêng hbrâ ăm roh tơplâ Ƀuôn Ma Thuột, mê mâu râ pơkuâ dêi Kuân khu 2, Kuân đoân 2 khu râ kăn pơkuâ ngŭy Sài Gòn ôh tá ‘nâi ki klâi ‘na roh pơtroh lêng xuân môi tiah pơkâ ki xiâm dêi lêng tơleăng lĕm cho alâi.

Rêm tơdroăng ki tơtrŏng pơrá tơmiât ‘na Peăng kơnhŏng Tây Nguyên. Drêng khu ki tơmâng tong kong têa Mih mot a Sài Gòn châ hlo tơdroăng ki ôh tá tơniăn dêi khu lêng tơleăng lĕm a tá Peăng kơnhŏng ƀă Peăng hdroh Tây Nguyên hiăng ai rơkong tơpui phá tơ-ê tung tơdroăng mơnhên alâi cho troăng vâ plâ ki xiâm.

‘’Khu xiâm pơkuâ lêng tơplâ xâ ‘nâi hdrối cho lêng kong têa ê ối nhôm mê pơkâ ăm á chêh môi kơthô ki ôh tá xê khât vâ ăm lêng kong têa ê tơngah xêh. Á chêh kơthơ cho pơtroh mâu tíu cheăng sư đoân 10, sư đoân 320, mâu lêng ƀinh chủng cho lêng kong têa ê hiăng tro lêng pin lu lêa cho plâ Ƀuôn Ma Thuột ƀă Peăng hdroh Tây Nguyên xua mê pin hiăng djâ khu lêng chu vâ séa ngăn khu lêng pin, xua mê mâu tíu cheăng thế thâ hbrâ tâi tâng tơdroăng tiô pơkâ tơplâ xâ’’.

Pêi pro hnê mơhno dêi Tơnêi têa: ‘’Pêi pro vâ lu lêa hên vâ pro lêng kong têa ê tơkŭm tơtrŏng a tơdroăng gâk kring peăng kơnhŏng Tây Nguyên’’, hbrâ tơplâ a tíu tơplâ B3 mơjiâng pơkâ pêi pro lu lêa lêng kong têa ê, tung mê mơnhên nhên: Hnoăng cheăng dêi pro lu lêa lêng kong têa ê cho kroăng chêng, pro hơkăng toi khu ki xiâm Kuân đoân 2 lêng kong têa ê a Pleiku ƀă Kon Tum, ôh tá ăm vâi troh lâp lu a Đức Lập, Gia Nghĩa, Thuần Mẫn.

Tiah mê pin hiăng djâ sư đoân 968 ing Peăng hdroh Lếo vêh teăng ăm sư đoân 320 ƀă sư đoân 10. Lôi ăm tâi tâng kơmăi hrik mơ’no hyôh phôn, tô tơbleăng tơdroăng 15W, mâu kơmăi kơmok tơbleăng tơdroăng ki kal ki ê ƀă troăng kơxái hrik mơ’no hyôh, pơtối tơbleăng mâu tơbleăng ƀă pơkâ ki ôh tá xê khât môi tiah dế pêi cheăng tiah hmâ, khu cheăng 2 sư đoân pơkí troh lâp lu lăm a peăng hdroh Tây Nguyên. Sư đoân 968 kô thăm pĕng tơrêi, pĕng kơnŏng, pơto kế kâ, ‘mrâm pháu pro tíu tơplâ ƀă kơnŏng ƀă kơno plong ki ôh tá xê khât. Pôa Nguyễn Hữu Mai, cheăng kal kí tiêuh đoân 4, trung đoân 29, sư đoân 968 hơ’muăn:

‘’Drêng mê, hnoăng cheăng dêi sư đoân 968 cho plâ Gia Lai, Kon Tum. Pin ăm mô đô̆i prôk lăm tơplâ, xuân ai tíu ki kí, tíu ki ôh tá kí, tíu ki pơkí, tíu tơbleăng ăm vâi ‘nâi vâ ăm lêng kong têa ê ‘nâi, vâi tơngah cho plâ amê xua mê vâi tơkŭm djâ lêng vêh’’.

Rơtế ƀă ngê̆ thuât pro lu lêa lêng kong têa ê, troăng tơplâ rĕng, plâ ôh tá ăm vâi ‘nâi, plâ ăm lêng kong têa ê ôh tá teăm ‘nâi xuân châ xúa vâ tung Tơplâ Tây Nguyên. Tiô Trung tươ̆ng Đoàn Sinh Hưởng, Ngế khên tơnôu khu lêng kuăn pơlê, cho Kăn pơkuâ Kuân khu 4, drêng veăng tơplâ Tây Nguyên, drêng plâ ƀâ Ƀuôn Ma Thuột, khu lêng pin tơkŭm po khu lêng tơplâ a 3 troăng ƀă 5 tíu plâ ƀâ:

‘’2 chôu kơxo hâi lơ 10/3 rơxế komƀa châ lo lăm tơplâ, ai mâu troăng pin thế uâ loăng hdrối vâ rơxế komƀa gu chiâng troăng prôk mê ôh tá chiâng pro hdrối troăng. Cho a 5h30 kơxo mê rơxế komƀa hiăng troh tíu. Kố cho tíu tơplâ blong trâu xua Măt trâ̆n tơkŭm po 1 tiêuh đoân thăm mơdêk, 1 tiêuh đoân prôk chêng, 1 đăi đô̆i rơxế komƀa ƀă 1 đăi đô̆i K63 môi tiah mê cho tíu ki blong trâu tơkŭm plâ ing peăng Mâ hâi luô vêh pâk tơdrăng a sư ƀô 43. Kố cho troăng plâ ki kơ’nâi kố pôa Hoàng Minh Thảo tối kố cho troăng plâ tơpo reăng tung đông lêng kong têa ê’’.

Tung tơdroăng tơplâ Tây Nguyên, Khu xiâm kal kí pơkâ rah troăng Peăng hdroh Tây Nguyên ƀă Ƀuôn Ma Thuột cho pơkâ plâ ki xiâm hiăng mơjiâng tơdroăng ki kơdrâ tâi tâng ƀă khu lêng Ngŭy Sài Gòn. Laga mâu ngế ki tơmâng to tơdroăng kal CIA a peăng hdroh ôh tá kâi loi mô đô̆i pin po tơplâ xâ Tây Nguyên ƀă roh plâ ƀâ Ƀuôn Ma Thuột. Pin ai môi tơdroăng tơplâ ki pro lu lêa lêng kong têa ê, pro lu lêa lêng kong têa ê ing khu lêng, pro lu lêa kong têa ê ing tơdroăng kal, pro lu lêa kong têa ê ing khu pêi cheăng, pro lu lêa kong têa ê cho djâ khu lêng pin ing peăng kơnhŏng Tây Nguyên mot Peăng hdroh Tây Nguyên ƀă pro lu lêa lêng kong têa ê tá tung tơdroăng hbrâ tíu tơplâ, hbrâ vâ plâ Ƀuôn Ma Thuột.

Trung tươ̆ng Nguyễn Thanh Tuấn, kăn pơkuâ Kơ koan xiâm hnê mơhno cheăng lêng, Kơ koan xiâm kal kí khu lêng kuăn pơlê Việt Nam tối ăm ‘nâi:

‘’Ƀă pin, tung tơdroăng tơplâ xâ pro pơkuâ Tây Nguyên kô tơleăng lĕm châ peăng Hdroh tơnêi têa môi tuăn tơnêi têa. Xua mê Tơdroăng tơplâ Tây Nguyên ƀlêi trâng, Ƀuôn Ma Thuột châ tơƀrê mơjiâng tơdroăng ki  châ kâ a tíu tơplâ. Tơdroăng ki kal kố rế thăm pro kơdrâ hên, lêng kong têa ê rế xâu hên. Cho xua tơdroăng kơdrâ mê, hiăng pro tơhnâp tơdroăng ki khŏm vâ tơplâ tung hiâm mơno dêi mâu khu lêng Ngi Sài Gòn ƀă khu lêng ki veăng kong têa ê. Ƀlêi trâng Tây Nguyên pro tơ’lêi hlâu vâ pin pro tơklâ troăng pêi cheăng ton xŏn a peăng hdroh Việt Nam, po apoăng ăm roh tơplâ ki rơdêi’’.

Ngê̆ thuât pro lu lêa lêng kong têa ê tung tơdroăng tơplâ Tây Nguyên cho môi tơdroăng ki châ ƀlêi trâng kân, gum tung ƀlêi trâng tơdjuôm dêi roh tơplâ xâ ƀă xông tơplâ xâ rơnó hơngui 1975. Tơdroăng ki pêi rơkê tung tơplâ pro lu lêa kong têa ê, tơdroăng tơrŭm ƀeăn ƀĕng pơla mâu khu lêng, ƀă tơdroăng khŏm tơleăng peăng Hdroh tơnêi têa hiăng djâ tơdroăng tơplâ xâ Tây Nguyên mot tung tơdroăng roh nah môi tiah môi tơdroăng ƀlêi trâng kân.