Tiô tơdroăng ing Vi ƀan tơring Tuy Đức, a kơxo lơ 6/8, tung thôn 4, cheăm Dak Buk So ai tíu rơheăng tơnêi ƀă kân rơdâ 5cm troh 80 cm, xŏn dâng 110 met. Tíu prêa, rơheăng kố ối tung kơpong kuăn pơlê rêh ối, tơdjâk troh dêi 21 rơpŏng kuăn pơlê. Tung mê, hiăng ai 2 rơpŏng kuăn pơlê ai tơmeăm ki tơ’nôm peăng parŏng hiăng tơhnâp tâi tâng.

19 rơpŏng ki ê ai mâu tíu rơheăng a mơnât ƀă trăng hngêi. Khu râ kăn cheăng tơring Tuy Đức hiăng séa ngăn, mơnhên, chêh tối ki kal, tâp kơƀăng tối tơbleăng kơpong tơhnâp. Tơdrêng amê pơtroh khu mơngế tŏng kum thâ rĕng xĕn kuăn pơlê lo ing kơpong ki rơ-iô.

Tiah mê, drêng kố, tung tơring Tuy Đức, tŭm 2 to cheăm tơkăng kong cho Dak Buk So ƀă Quảng Trực ai tơdroăng tơnêi tơhnah tơhnâp, prêa, rơheăng râ ó, mơnhâu troh tơdroăng rêh ối, châ chăn kuăn mơngế, tơmeăm khoăng dêi vâ chê 100 rơpŏng kuăn pơlê.