Ngoh Rơ Châm Dun, 30 hơnăm, (mơngế Jarai, ối a pơlê Ngol Rông, cheăm Ia Krêl tơring Đức Cơ) châ Kŏng ti 74, Ƀinh đoân 15 rah xo pêi cheăng pro kŏng nhân kúa chá kơxu sap apoăng hơnăm kố. Ngoh tối ăm ‘nâi, ƀă kơlo liăn 7 rơtuh liăn 1 khế, ngoh hiăng ai tơdroăng rêh ối tơniăn tâ.

“Hdrối mot pro kŏng nhân mê rơpŏng á pá puât, nôkố ai hngêi ối, ai tơdroăng cheăng pêi mê á xuân pói vâ châ tơniăn, la ngiâ kuăn ‘nĕng châ hriâm tâp, á mơnê kŏng ti hiăng tŏng kum á’’.

Ƀă ngoh Ksor Y Đô ối a cheăm Ia Krêl, tơring Đức Cơ, châ tơdroăng tŏng kum dêi mâu kăn ƀô̆ tung Kŏng ti 75, Ƀinh đoân 15, troh nôkố ngoh hiăng chiâng rơkê pêi cheăng ƀă châ pơcháu kơdrum loăng kơxu vâ kúa chá kơxu:

“Mot kúa chhá kơxu mê chiâng rơkê kúa, ‘nâi hên tơdroăng ki rơkê. Hdrối nah tá hâi hriâm tá hâi chiâng kúa. Ing hnê mơjiâng mê á loi tơngah tơdroăng ki á chiâng kúa, hbrâ vâ mot pro kŏng nhân vâ tăng tơ’nôm liăn ngân ăm rơpŏng’’.

Mâu hơnăm hiăng hluâ, Kŏng ti 74, Kŏng ti 75, ối tung Ƀinh đoân 15, (pro đông a tơring tơkăng kong Đức Cơ, kong pơlê Gia Lai) hiăng hnê mơjiâng vâ chê 2.000 roh ngế kúa chhá kơxu cho kuăn pơlê hdroâng kuăn ngo a pơlê. Mâu tíu cheăng ối pêi pro châ tơƀrê tơdroăng pơtâng tối mơhnhôk kuăn pơlê, kum rêh ối pơlê pơla, ƀă tơdroăng diâp ro hdrê ăm kuăn pơlê; ‘’Kum o troh hngêi trung’’ ăm vâi hdrêng kơtiê; rơnêu, pro troăng kân, hngêi tuăn pâ, hngêi ‘’Rŭm môi tuăn’’, tơkŭm po kâ Têt ƀă kuăn pơlê, diâp kơxuô tơmeăm ăm rơpŏng ai hnoăng... ƀă tâi tâng kơxô̆ liăn lối chât rơtal liăn.

Krê ‘na tăng cheăng pêi ăm kuăn pơlê, Đăi tă Trịnh Hà Tâm – Kăn pơkuâ Kŏng ti 75 - Ƀinh đoân 15 tối ăm ‘nâi:

“Kŏng ti hơnăm kố cho hiăng rah xo tŭm mơngế pêi cheăng, 100% cho mơngế pêi cheăng a pơlê. Drêng hnê mơjiâng tŏng kum mê á tŏng kum tâi tâng ‘na kế tơmeăm khoăng kum tung pêi chiâk deăng môi tiah ăm xơkê kúa vâ vâi hriâm ƀă hnê ăm vâi troăng pêi xua thế hriâm kih thuât ki rơkê ƀă pêi inhên, kơchăng, xua mê khu ki hnê ƀă kăn ƀô̆ đi đo râng kŏng hnê cheăng pêi prôk 3 rơtế ƀă mơngế pêi cheăng’’.

Mơnhên ‘na hnoăng dêi Ƀinh đoân 15 tung tơdroăng pêi pro tơdroăng kum hdroâng kuăn ngo, pôa Trần Ngọc Phận, Kăn phŏ hnê ngăn Viƀan tơring Đức Cơ, tối:

“Tíu pêi cheăng dêi Ƀinh đoân 15 mê mâu kŏng ti tŏng kum ăm tơring cho kân tung mơ’no liăn cheăng mơjiâng hngêi trăng troăng klông, mơhá liăn khế ăm kŏng nhân, ki hên cho kuăn pơlê hdroâng kuăn ngo. Ki rơhêng vâ tối cho tơdroăng gâk kring tơniăn, tơrŭm ƀă tơring tung tơdroăng mơjiâng thôn pơlê nếo mê mâu kŏng ti pêi lĕm tro.

Mâu tơdroăng ai ivá mê kŏng ti kô kum tơring rĕng ƀă teăm tơdrêng, mơjiâng cheăng pêi, pêi lo liăn dêi kuăn pơlê mê tơniăn tơdroăng rêh ối’’.

Đăi tă Khuất Bá Cao, Kăn pơkuâ hnê ngăn cheăng Đảng, Kăn phŏ pơkuâ Ƀinh đoân 15, tối ăm ‘nâi, kơjo rah xo mơngế hdroâng kuăn ngo a pơlê mot pro kŏng nhân cho môi troăng hơlâ dêi Đảng ủy, Khu xiâm pơkuâ Ƀinh đoân 15, kum mơnhông cheăng kâ, mơdêk tơdroăng rêh ối ăm kuăn pơlê, rak tơniăn gak kring kal kí, tơniăn lâp pơlê pơla kơpong tơkăng kong:

“Vâ chê 800 ngế kuăn pơlê hdroâng kuăn ngo dêi Ƀinh đoân châ ngin tŏng kum. Ngin hiăng hnê mơhno mâu tíu cheăng dêi Ƀinh đoân tơmâng tŏng kum, mơdêk ki dâi lĕm xuân môi tiah kơjo mơdêk rah xo mơngế kuăn pơlê hdroâng kuăn ngo mot pro kŏng nhân a mâu đông vâ tơniăn ‘na pêi lo liăn, tơdroăng rêh ối kuăn pơlê ƀă hên kơxô̆ liăn, troăng pêi vâ kum ăm kuăn pơlê ‘na tơdroăng tơmeăm khoăng ƀă tơmeăm kum tung pêi cheăng, rơxế, kih thuât, hdrê, liăn.

Mơ-eăm pơtâng tối mơhnhôk kuăn pơlê pêi cheăng pêt mơjiâng tơmeăm, pêi cheăng ai kih thuât, chiâng pêi rơkê’’.