Châ tơƀrê kố cho ing pêi lo liăn dêi kuăn pơlê tâk hên kơnôm mâu tơmeăm pêi lo ing chiâk deăng to kơnâ yă. Tung mê, krê ƀăng deăng kơphế dêi tơring ai dâng 22.000ha, pêi lo châ lối 55.000 tâ̆n, djâ pêi lo liăn lối 6.600 rơtal liăn. Rơtế ƀă mê, Dak Mil ai lối 5.300 ha ƀăng deăng tiu, sầu riêng ƀă mâu loăng plâi kâ ki kơnâ, hơnăm hiăng hluâ pêi lo châ hên.

Tiô pôa Lê Văn Hoàng, Kăn hnê ngăn Vi ƀan tơring Dak Mil, pêi chiâk deăng dâi lĕm hiăng gum kal khât tung tơdroăng châ tơƀrê dêi tơring hơnăm 2024 drêng tá 12/12 túa pơkâ cheăng kâ pơlê pơla pơrá châ ƀă hluâ pơkâ. Tơtêk cheăng kâ dêi tơring hơnăm hiăng hluâ châ 9,19%, vâ chê châ péa xôh kơlo tơtêk dêi kong pơlê Dak Nông.