Ngoh  Y Quân Hdok, kuăn ngo Rơđế ối a pơlê kong kơdrâm Buôn Ma Thuột, kong pơlê Dak Lak nếo mot Đảng a khế 1 hơnăm 2025. Ngoh Y Quân tối, hlo mâu đảng viên tung pơlê cho mâu ki djâ troăng a hdrối tơmâng khât, mâu ngế kuăn pơlê pâ nhoăm, mê ngoh mơ-eăm vâ châ mơngế đảng viên. Tơdrêng ƀă tơdroăng pêi cheăng lĕm tro hnoăng cheăng dêi môi ngế pêi cheăng a Khu rơhdruê xuăng ‘na kuăn ngo Dak Lak, Y Quân ối mơ-eăm pêi mâu tơdroăng gum kuăn pơlê a mâu pơlê.

Ngoh ƀă mâu vâi droh rơtăm tung pơlê đi đo tơkŭm pêi mâu tơdroăng mơhno túa lĕm tro, hơdruê xuăng, mơhnhôk kuăn pơlê pơtối rak túa lĕm tro kuăn ngo tơná. Y Quân tối:

“Á hâk tơngăm dêi tơná châ mot Đảng Kŏng san Việt Nam. A kô mơ-eăm hriâm, rơnêu pât tơná vâ tơxâng cho môi ngế đảng viên”.

Pôa Lê Văn Nhuần, Kăn hnê ngăn Chi ƀô̆ ƀuôn Alê A, bêng Ea Tam, pơlê kong kơdrâm Buôn ma Thuột, kong pơlê Dak Lak ăm ‘nâi: Tơdroăng mơnhông tơ’mot Đảng cho hnoăng cheăng pêi ki kal châ kong pơlê pêi ahdrối. Xua tung pơlê ai lối 90% pơ’leăng mâ mơngế kuăn ngo Rơđế, hên kuăn pơlê thế lăm pêi cheăng kâ hơngế mê kơxô̆ mơnhông vâ châ mot đảng chiâng pá ôh tá châ hên. Mơhé ti mê, hơnăm 2024, chi ƀô̆ xuân tơ’mot 2 ngế đảng viên nếo. Pôa Lê Văn Nhuần ăm ‘nâi, tâi tâng tung chi ƀô̆ hiăng ai 76 ngế đảng viên; pơtối rak vế hnoăng cheăng dêi tơná, malối hiăng hnê tối, mơhnhôk kuăn pơlê mơnhông cheăng kâ - túa lĕm tro - rêh ối pơlê pơla, tơniăn ‘na cheăng lêng kring gak pơlê pơla cheăm bêng ƀă mơnhông khu cheăng kal kí a cheăm bêng.

“Tá đảng viên dế tơkŭm hôp chi bộ a kố, lơ đảng viên tơkŭm hôp a tíu ki vâi dế rêh ối xuân veăng tơ’’noăng a cheăm bêng ki tơná ối. Malối cho mâu ngế đảng viên ki rêh ối a mâu tíu ki vâi dế ối veăng ‘no hnoăng hên tá tuăn mơheăn pêi cheăng ƀă hnoăng cheăng pêi, ing droăng veăng tối há mâu tơdroăng a pơlê cheăm. Xua mê, pơlê cheăm ngin hơnăm ki lâi xuân châ râ kơpêng khĕn kơdeăn, malối cho tơdroăng kuăn pơlê pêi pro”.  

Ƀă mâu pơlê, cheăm ki ai krâm kuăn ngo rêh ối, tơdroăng pơtối tăng ăm hriâm tơ’nôm, klêi mê vâ tơ’mot ăm mot đảng viên ôh ta xê to rah xo ngế ki lâi kơhnâ rơkê, mê ối thế ăm hriâm ‘nôi tung pơla hriâm, mơdêk tuăn ngôa hlê plĕng troăng hơlâ kal kí ƀă hlối tơbâ tơmeăm khoăng ki ai hlâu dêi kuăn pơlê. Môi tiah a cheăm Yang Tao, tơring Lăk, kong pơlê Dak Lak, tíu ki ai troh 95% kuăn ngo rêh ối, la ƀă tơdroăng mơ-eăm “Mơjiâng, mơnhông chi ƀô̆ rơdêi” rêm khu tơrŭm cheăng Đảng hiăng mơjiâng pơkâ, tơbleăng Pơkâ ‘na mơnhông đảng viên rêm hơnăm. 

Tơdrêng amê, mâu đảng viên tung tơrêm chi ƀô̆, kơhnâ pêi mâu tơdroăng cheăng djâ troăng a hdrối, pro tơdroăng pơloăng mơnúa chiâng rôh ki tơ’lêi mơnhông tơƀrê cheăng kâ - rêh ối a pơlê cheăm. Pôa Y Wu Sruk, phŏ kăn hnê ngăn Vi ƀan cheăm Yang Tao, tơring Lăk ăm ‘nâi:

“Á hlo túa tơlá rêh ối dêi kuăn pơlê a kố, malối tung nâl tơpui, tơpui tơno drêng trâm mâ pin hlâu vâ tối ăm vâi kra nhŏng o. Klêi mê ‘nâi tơdroăng rêh ối dêi kuăn pơlê, pin hlê tơdroăng xơpá dêi kuăn pơlê. Ing tơdroăng ki hlê mê pin xúa pêi pro, hnê mâu troăng hơlâ dêi Đảng, Luât tơnêi têa ăm kuăn pơlê vâ kuăn pơlê hlê ƀă hlối xúa tung rêh ối cheăng kâ’’.

Hlê nhên ki kal dêi tơdroăng mơnhông mot Đảng, mâu kăn kong pơlê Dak Lak hiăng ƀă dế tơbleăng pêi hên troăng hơlâ vâ pro tơ’lêi hlâu ăm mâu đảng viên, malối cho mâu đảng viên kuăn ngo ki veăng mot Đảng. Tơdrêng amê mâu luât pơkâ tŏng gum ‘na hnê hriâm, hnê tơ’nôm tơpui tơno, pro tơ’lêi hlâu ăm tơdroăng rêh ối pêi cheăng a kơpong hơngế hơngo, hiăng veăng mơdêk ki tơƀrê tung râk ngăn ƀă ‘mâi hơ’lêh dêi mâu kăn. Pôa Lê Nam Cao, Phŏ hnê ngăn khu tơrŭm cheăng kăn ƀô̆ kong pơlê Dak Lak ăm ‘nâi:

“Khu Kăn pơkuâ hnê ngăn Đảng rêm râ tơmâng tăng mơngế kuăn ngo klêi mê pơtroh ăm hriâm a hngêi trung hnê kuăn ngo ai tíu kâ koi ối pơtê râ tơring ƀă râ kong pơlê. Má péa nếo, cho pêi pro tiô luât pơkâ rah mâu vâi o kuăn ngo kô rah xo ăm pêi cheăng a mâu kơ koan. Ing mâu tơdroăng vâ mơhno ăm mê kô cho xiâm ki kal vâ pơkâ tăng mâu ngế pro kăn pơkuâ rak ngăn rêm râ”.

Ƀă ki xiâm cho cheăng kâ rêh ối, malối kuăn pơlê a Dak Lak, tơdroăng tăng mơ’ngế vâ mot đảng viên tung hdroâng kuăn ngo ôh tá xê to ai pơxúa kal kí mê ối veăng mơdêk pơ’lêh tâi tâng tơdroăng a pơlê cheăm. Ing mâu đảng viên kuăn ngo mê dế pro “kông tơdjêp’’ hnê mơhno troăng hơlâ dêi Đảng troh kuăn pơlê, thăm tơ’nôm tuăn loi dêi kuăn pơlê ƀă Đảng; cho kơxái ki tơkoh tơdjêp krá ƀă khu tơrŭm dêi mâu hdroâng kuăn ngo; mơjiâng tơdroăng rêh ối rơkê plĕng; gum kuăn pơlê mơnhông cheăng kâ, veăng pêi kơhnâ a mâu pơkâ ‘na mơnhông cheăng kâ-rêh ối mơdêk ivá pơkuâ hnê mơhno, ivá tơplâ, mơjiâng khu cheăng Đảng, khu cheăng kal kí rế ton rế krúa, rơdêi.