VOV4. Xơ Đăng - Drêng tơdroăng tơnêi tơdro đi đo a tơring Kon Plông, kong pơlê Kon Tum, hâi lơ 26/4, Khu râ kăn pêi cheăng dêi Khu xiâm mơjiâng tơmeăm khoăng hiăng troh séa ngăn nhên mâu tơmeăm mơjiâng a kơpong tơnêi tơdro tơring Kon Plông ƀă ai roh pêi cheăng ƀă Viƀan kong pơlê Kon Tum. A roh pêi cheăng ƀă Viƀan kong pơlê Kon Tum, ing tơbleăng, tơpui tối, tơdroăng ki ai nôkố, pôa Lê Quang Hùng, Ngế xiâm phŏ pơkuâ ‘na mơjiâng tơmeăm khoăng tối, vâ ai xiâm kối mơnhên ‘na tơdroăng tơnêi tơdro, pơkâ thế Viê̆n Hàn Lâm khoa hok Việt Nam, Viê̆n khoa hok kŏng ngê̆ - Khu xiâm mơjiâng tơmeăm khoăng tơkŭm po krâ tơ’noăng kơmăi séa ngăn vâ pêi kêi đeăng kơmăi séa ngăn tơnêi tơdro a kơpong tung la ngiâ.

Pôa Lê Quang Hùng, Ngế xiâm phŏ pơkuâ Khu xiâm mơjiâng tơmeăm xông tơpui a roh pêi cheăng ƀă Viƀan kong pơlê Kon Tum

Ƀă Viƀan kong pơlê Kon Tum, khu râ kăn pơkuâ kal rĕng pơkâ mâu khu pơkuâ long rơchôa têa tơkŭm xêo nhên, séa ngăn tơniăn long rơchôa vâ ai troăng hbrâ ví; hnê mơhno kuăn pơlê ‘nâi hbrâ drêng ai tơnêi tơdro.

            A Sa Ly tơplôu ƀă tơbleăng