Pakĭng mê, kong pơlê hiăng kĭ tơhrâ tơrŭm cheăng ƀă kong pơlê Attapeu dêi kong têa Lếo. Mê cho, Vi ƀan hnê ngăn kong pơlê Dak Lak hiăng trâm 27  khu  tơmối kong têa ê troh veăng Leh mơdĭng kơphế Buôn Ma Thuột. Tung mê, ai jâ Vanusia Nogueira, ngế pơkuâ ngăn Khu tơrŭm cheăng kơphế lâp plâi tơnêi; mâu kăn teăng mâ dêi Mih a Việt Nam, Kăn teăng mâ Mông Cổ a Việt Nam, Kăn teăng mâ Philippines a Việt Nam, Kăn teăng mâ Rusi a Pơlê kong kân Hồ Chí Minh, Kăn teăng mâ Ấn Độ a Pơlê kong kân Hồ Chí Minh, Kăn teăng mâ Lếo a Đà Nẵng...

Tơbleăng a roh trâm mâ, pôa Trương Công Thái, Phŏ Kăn hnê ngăn Vi ƀan kong pơlê Dak Lak tơngah, tung mâu hâi veăng leh mơdĭng, mâu tơmối lâp plâi tơnêi kô châ hlo, châ ngăn, châ ‘nâi ‘na tơnêi têa kuăn mơngế Dak Lak tối tơdjuôm ƀă pơlê kong kơdrâm Buôn Ma Thuột tối krê.  Pôa púi vâ Kăn teăng mâ mâu kong têa a Việt Nam, khu kăn mâu kong pơlê ki achê, Kăn xiâm teăng mâ mâu kong têa tung lâp plâi tơnêi kô rơtế ƀă Dak Lak tơbleăng troh lâp luâ túa lĕm tro, ki xú hŏm lĕm dêi kơphế Buôn Ma Thuột xuân môi tiah tơdroăng vâ mơnhông rế hên dêi kơpong tơnêi ‘’ki lĕm dêi kong ngo’’ ăm vâi pú tung lâp plâi tơnêi ‘nâi.