Prôk tâ tá drô troăng kơphô̆ dêi pơlê kong kơdrâm Ƀuôn Ma Thuột, kong pơlê Dak Lak, môi tiah: Phan Chu Trinh, Lê Thánh Tông, Y Jut ƀă hên hĕng mâu tíu ki ê mâu tơmeăm ki tê kơƀăn Trung thu ki ai inâi vâ ô eăng châ bro rơnuâ, mơhno tối cho lĕm mơnâ mâ ngăn. Tiô nâ Bạch Thí Bích Phượng, ngế ki pơkuâ hngêi mơdró tơmeăm a troăng Lê Thánh Tông, hơnăm kố nâ rĕng mơ’no tê hdrối tâ, sap ing 2 pơla măng tĭng hdrối la kơxô̆ mơngế ki troh rôe ôh tá ‘nhó hên.

‘’Hơnăm kố, kuăn pơlê rĕng lăm tăng rôe, la ôh tá ai hên to lâi. Yă tê mâu tơmeăm mê xuân hiăng chía tâk iâ, khu kơƀăn ki hdrối nah cho kơnâ nôkố hiăng chía kơdroh iâ, kơƀăn ki tê ‘ngré yă chía tâk iâ tâng tê rôe iâ’’.

Tiô nâ Bạch Thị Sách, ngế ki hiăng hmâ tê mơdró mâu kơƀăn trung thu a pơlê kong kơdrâm Ƀuôn Ma Thuột châ lối 10 hơnăm kố ai tối, vâ pôi tá ai tơdroăng  kơƀăn lối lĕng hên tung mơdró, mê nâ rế tê, rế ngăn tơdroăng ki kuăn pơlê kal vâ rôe lơ ôh, vâ rôe hên lơ rôe iâ, mê nâ nếo ‘mot khu kơƀăn tê tơtro ƀă tơdroăng pói rơhêng vâ dêi kuăn pơlê:

‘’Ki xiâm dêi tơdroăng tê mơdró cho kal ai mơngế rôe, la mơngế rôe xuân tá hâi ai hên, vâi bu tăng rôe i iâ. Tâi troh dâng lâi mê á ‘mot kơƀăn hên to mê, á ôh tá khên ‘mot hên khu kơ-ƀăn xua tơdroăng tê mơdró kố ga ai tơdjâk hên tơdroăng. Á tê châ hên mê á ‘mot hên khu kơƀăn, tê châ iâ á ‘mot iâ, tâng ‘mot hên khu kơƀăn luâ râ ah kô rơlối tê, mơ’nhê xo xo’’.

Kơƀăn Trung thu hơnăm kố ga ai hên túa, hên ki ngeăm, hơ-iâ pơ-rá phá dêi pó. Pakĭng mâu khu kơƀăn ki hmâ châ tê cho kơƀăn pôh ƀă kơƀăn ki rơmuăn ki pin hmâ kâ, mê ai tơ’nôm kơƀăn túa ki ê, môi tiah: ki kơhiâm xú hŏm môi tiah kơteăm, kơxêt tâng lâr, jambon xá xíu, í pheăng ƀă hên mâu kơƀăn ki ê. Pakĭng mê, ối ai mâu kơƀăn ki hmâ tê ăm vâi hdrêng ƀă mâu ngế ki hmâ ât hơ’nêh, ât mâm.

Pakĭng tơdroăng ki tăng rôe kơƀăn Trung thu a tíu mơdró mê nôkố mơngế ki rôe xuân ai tơ’nôm vâ tăng rah rôe tơmeăm a mâu tíu ki tê mơdró điê̆n tưh lơ a mâu zalo, facebook. Nâ Trần Thị Ngân, ối a bêng Tân An, pơlê kong kơdrâm Ƀuôn Ma Thuột ai tối tiah kố:

‘’A kơchơ ai hên khu kơƀăn, la ki xiâm dêi tơdroăng á tăng rôe mê cho kal lĕm, kơhiâm, ngeăm, la krúa, um méa ga xuân athế lĕm, kơƀăn ki hiăng ai inâi châ ô eăng hdrối mê hía nah’’.

Vâ rak tơniăn ăm tơdroăng ki xúa ƀă ivá dêi mơngế ki rôe kâ, khu râ pơkuâ ngăn tê mơdró a kơchơ dế thăm lăm séa ngăn, mơnhên a hngêi kơchơ, hngêi mơdró ki tê kơƀăn vâ mơdât tơdroăng ki mơjiâng bro, tê mơdró tơmeăm ki ti xê khât, ôh tá ‘nâi nhên xiâm kối, ôh tá tơniăn ki lĕm, ôh tá krúa, ah chiâng pro ‘mêi ăm mơngế ki rôe kâ. Pôa Giao Thanh Tùng, Kăn phŏ ngăn ‘na tê mơdró kơchơ dêi kong pơlê Dak Lak tối ăm ‘nâi:

‘’Khu pơkuâ ngăn mơdró kơchơ hiăng pơkâ ăm thế khu pơkuâ ngăn kơchơ hnoăng cheăng, ki má môi cho pơkuâ ngăn tíu mơdró, ‘nâi nhên xiâm rêi, kế tơmeăm, khu kơƀăn trung thu, tíu ki tê mơdró mâu tơmeăm xah hêi dêi vâi hdrêng. Klêi mê, hnối pơ-ô po-eăng kơdeăn kheăn mâu tíu ki mơjiâng bro, lơ mâu hngêi mơdró kơƀăn trung thu ki pêi pro lĕm tơniăn, tro tiô pơkâ dêi luât, ƀă mâu tíu mơdró ki lâi ôh tá tro mê kô hôu khĕn, pơxâu phak kơtăng tro tiô tơdroăng pơkâ dêi luât, pá kĭng mê, ƀă mâu hngêi mơdró ki lĕm xuân ai mơ’no tung um tơvi, mâu tíu mơdró ki ôh tá tơdrăng, lu lêa, tê mơhniăng tơmeăm ki ti xê khât, ôh tá krúa lĕm xuân athế mơ’no tung um tơvi, hlá tơbeăng vâ tâi tâng kuăn pơlê ‘nâi’’.

Pôa Đặng Hoa Nam, Ngế xiâm pơkuâ ngăn vâi hdrêng, ối tung Khu xiâm ngăn ‘na Cheăng pêi-Mô đô̆i rong ƀă Pơlê pơla nếo ai hlá mơ-éa pơkâ thế Khu ngăn Cheăng pêi ƀă Pơlê pơla mâu kong pơlê, pơlê kong kơdrâm pơkuâ ngăn, tơrŭm cheăng ƀă mâu kơ koan ki ai tơdjâk troh vâ rak vế tơniăn ăm vâi hdrêng tung roh Têt Trung thu hơnăm 2023.

Tung mê, pơkâ thế rak tơniăn, hbrâ mơdât on chếo kâ, kế pơtô ăm tơrêm hngêi rơpŏng, malối ƀă vâi hdrêng ki rah rôe, xah hêi mâu tơmeăm Trung thu ki ai mâu tơmeăm ki tơ’lêi troh on chếo kâ, lơ chiâng pơtôu, tung mê, mâu tơmeăm ki hmâ tê rôe, cho on hơlŏng, on ki ai têk on trĭng, ƀong ƀŏng kơneăng, tơ’lêi hiê̆ng tro on chếo kâ, chiâng pơtôu ƀă hên mâu tơmeăm ki ê, mơdât ôh tá ăm prâu on xah hêi, chôu mlŏi reăng tung mâu roh ki tơkŭm xah hê, kâ kơƀăn pro chiâng trâm tơdroăng ki rong râ, lơ pro chiâng hơ-ou, pou ‘mêi ing mâu kế tơmeăm ki xah hêi.

Vâ rak vế tơniăn ăm kế kâ, hbrâ, mơdât tơdroăng ki tro pôu ‘mêi, hơ-ôu ăm vâi hdrêng xua kâ mâu kơƀăn, kĕo, plâi, têa ôu ƀă hên mâu tơmeăm ôu kâ ki ê. Rak vế tơniăn ăm mâu rơxế, mơngế prôk lăm drô troăng tung pơla mâu hâi hdrối, tung ƀă kơ’nâi Têt Trung thu.

Tơdjâk troh hnoăng cheăng tơkŭm po Têt Trung thu ăm vâi hdrêng, jâ Nguyễn Thị Hà, Ngế xiâm phŏ ngăn Cheăng pêi-Mô đô̆i rong ƀă Pơlê pơla xuân hiăng kĭ hlá mơ-éa pơkâ thế mâu Vi ƀan mâu kong pơlê, pơlê kong kơdrâm pơkâ thế mâu khu râ, kơvâ cheăng ƀă Vi ƀan hnê ngăn rêm râ mơ’no liăn ngân ing liăn dêi tơnêi têa; mơhnhôk thế mâu khu râ, kơvâ cheăng, rêm ngế pôu, hbru tơmeăm Trung thu ăm vâi hdrêng.

Tung mê, tŏng kum ăm khât tâ ƀă mâu vâi hdrêng ki xahpá, kơtiê, malối ƀă mâu vâi hdrêng ối tung rơpŏng kơtiê, vâ chê kơtiê, vâi hdrêng ối tung kơpong hdroâng kuăn ngo, kơpong hơngế hơngo, tíu tơkăng kong, chuăn, rơlố têa kơxĭ, vâi hdrêng kuăn tê nôu pâ, vâi hdrêng ki tro tơdjâk xua khía mơhot kân, têa lân luô, tâ pơreăng ƀă hên mâu tơdroăng ki xahpá, xâu xía ki ê.