VOV4.Xơ Đăng - Hneăng tơ’noăng mơgêi râ má pái trung hok phôh thong ƀă rah xo hok tro mot đăi hok, hnê cheăng pêi hơnăm kố châ tơkŭm po tung 2 hâi 7 ƀă 8/7 a tâi tâng mâu kong pơlê, pơlê kong kơdrâm tung lâp tơnêi têa. Kŏng ti xiâm On tơhrik peăng Tơdế tơnêi têa hiăng hbrâ troăng xing xoăng on tơhrik ăm hneăng tơ’noăng, tơniăn bê on tơhrik, đi đo a mâu kong pơlê, pơlê kong kơdrâm kơpong peăng tơdế tơnêi têa – Tây Nguyên.

Kŏng ti xiâm on tơhrik peăng Tơdế tơnêi têa pơkâ thế Kŏng ti on tơhrik mâu kong pơlê, pơlê kong kơdrâm hbrâ tơrŭm ƀă Khu hnê mơhno, mâu Hô̆i đong tơ’noăng râ má pái Trung hok phôh thong a kong pơlê vâ ‘nâi nhên tơdroăng kal vâ on tơhrik, pro troăng pêi ƀă tơniăn bê on tơhrik ăm hneăng tơ’noăng.

Tiô châ ‘nâi, tung 13 kong pơlê, pơlê kong kơdrâm xua Kŏng ti xiâm On tơhrik peăng Tơdế tơnêi têa xing xoăng ai 422 tíu tơ’noăng. Mâu kong pơlê ai hên tíu tơ’noăng môi tiah Quảng Nam (55 tíu), Bình Định (43 tíu) ƀă Gia Lai (40 tíu). Nôkố mâu Tôh pêi cheăng troh lâp lu, Khu pơkuâ mơ’no on tơhrik, Khu rơnêu ki troh lâp lu thăm pêi cheăng tâng ai tơdroăng tơ’nhê, vâ rơnêu tung mâu hâi tơkŭm po hneăng tơ’noăng ƀă ai mơhá liăn ăm mơngế pêi cheăng tơtro vâ teăm tơdrêng rơnêu tâng tơ’nhê ƀă hía hé.

A Sa Ly tơplôu ƀă tơbleăng