Ngế pro xiâm phŏ ngăn ‘na hnê hriâm ƀă hnê mơjiâng tuăn ngôa rơkê Hoàng Minh Sơn ăm ‘nâi, tung pơla hdrối kố nah hiăng tô tuăn ‘na ôh tá bê tŭm hlá mơ-éa hriâm lâm 4, lâm 8 ƀă lâm 11. Ki xiâm, môi pâ cho mâu kong pơlê tung hơnăm kố hrá rah rôe hlá mơ-éa, môi pâ xua tơdroăng kĭ pơkâ yă dêi mâu kong pơlê. La ta troh nôkố, mâu kong pơlê hiăng kĭ tŭm. Ngế xiâm pơkuâ ngăn hnê hriâm ƀă hnê mơjiâng tuăn ngôa rơkê hiăng hên hdrôh pêi cheăng ƀă mâu kăn  pơkuâ ‘na chêh in tơbleăng hlá mơ-éa hnê hriâm Việt Nam vâ tăng troăng tah ki xơpá tung khu pơkuâ, hbrâ vâ in hlá mơ-éa ƀă vâ tối khât hiăng klêi in hlá mơ-éa hriâm dêi mâu hơnăm hdrối:

 ‘’Krê to hlá mơ-éa hriâm lâm 4, lâm 8 ƀă lâm 11 cho hlá mơ-éa hriâm ki nếo, nôkố hiăng tơkŭm po tăng tíu in ăm châ dâng 80%. Ki u ối dâng 20% mâu kong pơlê hiăng tối tơbleăng tŭm vâ Khu chêh in tơbleăng hlá mơ-éa hriâm Việt Nam chêh pơkâ tơkŭm in. Ƀă pơtối in klêi vâ teăm ăm xúa tung hơnăm hriâm nếo, ai tŭm hlá mơ-éa hriâm ăm mâu khu lâm 4, 8, 11. Tiah mê, kô pê klêi tơdroăng in tŭm hlá mơ-éa hriâm phôh thong’’.

Ƀă tơdroăng rah chêh hlá mơ-éa hriâm, troăng rơhlâ pơkâ hơ’lêh hlá mơ-éa hriâm, rah chêh, chêh tơbleăng, in hlá mơ-éa hriâm cho troăng rơhlâ ki kân hiăng châ tơbleăng a pơkâ kơxô̆ 88 hơnăm 2014 dêi Kuô̆k hô̆i. Kuô̆k hô̆i hneăng 14 xuân ai pơkâ kơxô̆ 122 mê cho drêng pêi pro tơdroăng rah chêh hlá mơ-éa hriâm tiô tơdroăng pơkâ pơ’lêh tiô tơdroăng rêh ối nếo tâng ai môn hriâm ki nhên hiăng klêi ki iâ gá khu kơxop hlá mơ-éa hriâm châ pơchuât ngăn nhên  hdrối vâ kĭ mê ôh tá tơbleăng rah chêh hlá mơ-éa ki xúa ing liăn ngân tơnêi têa ‘na môn hriâm ki mê.

Nôkố tâi tâng mâu môn xuân ai hlá mơ-éa hriâm. Pôa Hoàng Minh Sơn, Ngế xiâm phŏ hnê ngăn tối:

 “Drêng kố tâi tâng mâu lâm hiăng châ kĭ (9/12 to lâm) xuân ai tŭm 3 khu hlá mơ-éa hriâm. Khu xiâm ngăn hnê hriâm ƀă hnê mơjiâng tuăn ngôa rơkê kô pêi kơtăng tiô pơkâ 122. La ngiâ kô ah kô pơtối pơchuât ngăn nhên ƀă hlối kĭ 3 túa kơxop hlá mơ-éa hriâm nếo cho hlá mơ-éa hriâm lâm má mơ’nui râ, lâm  5, 9, 12’’.

Hneăng hôp rôh má 25 dêi Vi ƀan pơkuâ cheăng Kuô̆k hô̆i dế po a Hà Nội hiăng séa ngăn chuyên đề ‘’Tơdroăng pêi pro tiô Pơkâ kơxô̆ 88 Kuô̆k hô̆i hneăng 13 ƀă Pơkâ kơxô̆ 51 Kuô̆k hô̆i hneăng 14 ‘na pơ’lêh nếo tơdroăng hriâm hlá mơ-éa hriâm râ phôh thông’’. Vi ƀan pơkuâ cheăng Kuô̆k hô̆i pâ thế Khu xiâm ngăn hnê hriâm ƀă hnê mơjiâng tuăn tuăn ngôa rơkê tơkŭm rah chêh cho môi khu hlá mơ-éa hriâm ai tŭm tâi tâng sap lâp 1 troh lâm 12 mê ai 137 kơxop hlá mơ-éa hriâm.

Klêi tí tăng ngăn ăm hlo, tơdroăng hnê hriâm phôh thông hơnăm 2018 châ mơjiâng pro hên hĭn, kơtăng, hiăng pơ’lêh ing tơdroăng hnê vâ hlê ƀai troh tơdroăng vâ mơdêk hnê plĕng ‘na tuăn hiâm, ivá hriâm dêi hok tro; ‘nâi nhên 05 tơdroăng ‘na tuăn hiâm ƀă 10 tơdroăng ki kal, xiâm kal pơ’lêh nếo ƀă hok tro phôh thông. Tơdroăng ki kal tung kơxop hlá mơ-éa hriâm gá môi tiah tơdroăng pơkâ kal châ tơƀrê tiô tơdroăng chêh hriâm phôh thong ki nếo.

Tơdroăng rah chêh kơxop hlá mơ-éa hriâm hiăng mơhnhôk hên mâu ngế rơkê, khu cheăng khoa hok, mâu thái cô ki rơkê, ki vâi nhoăm, ki hiăng pêi cheăng la rơkê xuân veăng hriĕn chêh.

Tơdroăng hơ’lêh nếo tơdroăng hnê hriâm hlá mơ-éa hnê  hriâm cho cho tơdroăng cheăng pêi ki kal tơtrŏng khât, hên ngế veăng tơmâng vâ ‘nâi. Tiô mâu kăn, tơdroăng hriâm phôh thong gá ai hriâm tro tiô luât pơkâ mê tro, la tơdroăng hriâm mê bú pơkâ hriâm vâ hlê. La tơdroăng ki kal tung hriâm phôh thong cho kal khât ‘nâng, mê Tơnêi têa thế rak ngăn nhên krâu vâ tơdroăng hnê tro tiô troăng pơkâ.

Pôa Đỗ Văn Chiến, Kăn hnê ngăn Vi ƀan xiâm Măt trâ̆n tơnêi têa pơkâ thế:

" Tơdroăng kal pêi tơdrêng cho thế ai luât pơkâ séa ngăn nhên ing xiâm rah chêh, in, tơbleăng ƀă pin thế pro kơdroh yă hlá mơ-éa hriâm ăm tơtro ƀă tơdroăng ki pê lo liăn dêi kuăn pơlê nôkố. Kuăn pơlê ối pâ thế hlá mơ-éa hriâm mê thế Tơnêi têa rak ngăn yă. ‘Mâi rơnêu pin thế pêi pro. Xua tâng ăm ki klâi mâu ngế xơpá mê, á kô ăm “chư’’ cho ki krá pơxúa ton ta ah. Pâ thế dêi khu kăn séa ngăn thế ‘nâi xiâm há vâ pêi lơ ôh thế tí tăng ngăn, tăng ‘nâi plĕng nhên trâu vâ tơxâng’’.

Kăn xiâm hnê ngăn Kuô̆k hô̆i pơkâ thế thâ tơbleăng ƀă hlá mơ-éa hnê ‘na troăng rơhlâ pơkâ yă kơxop hlá mơ-éa hriâm, pơkâ yă ki kơnâ dêi kơxop hlá mơ-éa hriâm, tơniăn séa ngăn nhên kơxô̆ liăn chêh in, kơdroh kơxô̆ liăn ki tơdế rá, kơdroh liăn ki chêl hnoăng vâ kơdroh yă kơxop hlá mơ-éa hriâm. Kăn xiâm hnê ngăn Kuô̆k hô̆i  pơkâ thế pêi pro tiô tơdroăng tung Pơkâ kơxô̆ 88 Kuô̆k hô̆i ‘na hơ’lêh nếo Tơdroăng hnê hriâm tung kơxop hlá mơ-éa hriâm phôh thong:

“Pơkâ kơxô̆ 88 tối nhên: Khu xiâm ngăn hnê hriâm ƀă hnê mơjiâng tuăn ngôa rơkê thế tơkŭm rah chêh cho môi kơxop hlá mơ-éa  hriâm tŭm sap lâm 1 troh lâm 12  mê ai 137 kơxop hlá mơ-éa. Mâu khu tơrŭm cheăng, mơngế ki ê châ mơhnhôk veăng rah chêh hlá mơ-éa hriâm môi lơ môi ko kơxop hlá mơ-éa tiô kơ ivá tơná hlê, ôh tá khŏm thế rah chêh tŭm tâi tâng môi kơxop hlá mơ-éa hriâm.

Tiô Pơkâ kơxô̆ 88 ai tŭm tâi tâng ga ti mê. Pơkâ 122 cho pêi pro tơdrêng mê cho mâu kơxop hlá mơ-éa ki lâi ai tíu tê tối vâ rôe mê liăn ngân hâi tơxâng mê chiu tối cho hâi rah chêh kơxop hlá mơ-éa ki mê. Pơkâ kơxô̆ 122 tối ôh tá pơ’lêh Pơkâ kơxô̆ 88. Xua mê, tơdroăng nôkố tung tâi tâng khu séa mơnhên ngăn bú mơhno tối a hlo xuân tơxâng tơtrŏng, pin tí tăng ngăn ‘nâi plĕng tơ’nôm’’.