VOV4.Xơ Đăng - Hâi kố lơ 7/7, mâu hok tro tung lâp tơnêi têa pơxiâm mot tung hneăng tơ’noăng râ má pái phôh thong hơnăm kố ƀă môn tơ’noăng cho Ngữ văn tiô tơdroăng tơ’noăng tự luận, chôu pro ƀai cho 120 phut. Kơxê, tơ’noăng môn toán. Lâp tơnêi têa ai 63 to Hô̆i đong tơ’noăng, ƀă 2 rơpâu 443 tíu tơ’noăng. Ai 38 ngế hok tro ối tung F0 veăng tơ’noăng. Tiô tối tơbleăng rĕng dêi Khu xiâm ngăn hnê hriâm ƀă hnê mơjiâng tuăn ngoâ rơkê, riân troh 20 chôu 30 phut hâi lơ 6/7, hiăng ai lối 989 rơpâu ngế hok tro mâu tíu tơ’noăng tung lâp tơnêi têa pro hlá mơéa tơ’noăng, Ƀă lối 10 rơpâu ngế hok tro tá hâi pro hlá mơ-éa tơ’noăng.  

A kơxo kố, mâu hok tro pơtối pro hlá mơ-éa tơ’noăng hdrối vâ mot tơ’noăng môn ki apoăng dêi Hneăng tơ’noăng cho Ngữ văn. Khu xiâm ngăn hnê hriâm ƀă hnê mơjiâng tuăn ngoâ rơkê ăm ‘nâi, tâng pơchông ƀă hneăng tơ’noăng râ má pái hơnăm nah, hneăng tơ’noăng hơnăm kố Khu xiâm ai mâu tơdroăng ki ‘mâi hơ’lêh ‘na kih thuât tung tơkŭm po tơ’noăng, vâ kơdroh tơdroăng ki lu lêa tung tơ’noăng.

Xua mê, mâu hok tro kal pêi pro tro pơkâ tơ’noăng ƀă hnê mơhno dêi khu ki ngăn tơ’noăng. Ko ƀai tơ’noăng hơnăm kố kô tơkŭm tung tơdroăng ki tiah hmâ ƀă xuân ai tơdroăng ki hơ’leh, ing mê xing xoăng hok tro, tơtro ƀă tơdroăng pơkâ thế dêi hngêi trung đăi hok xua tơdroăng ki klêi kơ’nâi tơ’noăng vâ rah xo hok tro mot hriâm a mâu hngêi trung.

Katarina Nga tơplôu ƀă tơbleăng