Kong pơlê Kon Tum ƀă 2 to kong pơlê Attapeau, Sekong, kong têa  Lếo  ai tơdjuôm troăng tơkăng kong tơnêi têa xŏn lối 154km. Lối 3 hơnăm hdrối, 3 to kong pơlê hiăng tơbleăng tung hlá mơ-éa chôu pâ ‘na tơrŭm cheăng Măt trâ̆n pêi hên tơdroăng ki lĕm tro.

Ki tơƀrê cho tơdroăng hnê kuăn pơlê hlê plĕng, hnê ăm kuăn pơlê 3 to kong pơlê hbrâ mơdât pơreăng COVID-19; Hơnăm tơrŭm môi tuăn pơla Việt Nam - Lếo 2022; rơtế amê, pêi pro ai pơxúa tơƀrê tơrŭm lăm tăng kơxêng kiâ, châ tăng hlo 199 kơxêng kiâ mâu mố đô̆i ƀă mâu ngế rơkê dêi Việt Nam ki pleăng hnoăng tơná tơplâ nah a kong têa Lếo djâ vêh ‘mé a ilâng kiâ pơlê; mơjiâng troăng tơkăng kong hơniâp lĕm, tơrŭm tơrôa mơnhông tơ ƀrê...

A hneăng hôp, Vi ƀan Măt trâ̆n tơnêi têa Việt Nam kong pơlê Kon Tum rơtế ƀă Vi ƀan Măt trâ̆n kong têa Lếo mơjiâng tơnêi têa 2 to kong pơlê Attapeau ƀă Sekong hiăng tơpui tối ‘na tơdroăng cheăng măt trâ̆n; môi tuăn pơtối rak vế ƀă mơnhông tơrŭm cheăng tơdjuôm, krá, loi nhoăm.

Măt trâ̆n tơnêi têa 3 kong pơlê pơtối tơrŭm krá, hnê tối ăm dêi rơpó túa pêi cheăng tung tơdroăng cheăng Măt trâ̆n mơdêk tơrŭm tung mâu tơdroăng cheăng kâ, tê mơdró, khoa hok - kih thuât, mơhnhôk kuăn pơlê péa tơnêi têa pêi tro tiô luat môi tuăn dêi rơpó tung tâi tâng hdroâng mơngế tung mơjiâng ƀă kring vế tơnêi têa dêi tơrêm tơnêi têa.