Kố cho rôh lăm pôu păng ‘nâng ki apoăng dêi kăn xiâm hnê ngăn Kuô̆k hô̆i Bulgaria troh a Việt Nam klêi kơ’nâi vâ chê 12 hơnăm; cho tơdroăng hdró ki kal tung tơrŭm cheăng Việt Nam – Bulgaria, malối cho drêng Kuô̆k hô̆i péa tơnêi têa nếo kĭ ƀă tơbleăng Hlá mơ-éa chôu vế tơrŭm cheăng.

Tơrŭm tơroâ, tơrŭm pơla Kuô̆k hô̆i péa tơnêi têa đi đo châ ‘mâi mơnhông ƀă mơdêk tơƀrê. Péa pâ hmâ pơtroh khu râ kăn troh a tơnêi têa dêi rơpó, rak vế trâm mâ, tơrŭm ƀă tŏng kum dêi rơpó a mâu rôh hôp Kuô̆k hô̆i tung kơpong ƀă a kong têa ê ki Kuô̆k hô̆i péa tơnêi têa rơtế veăng tơrŭm môi tiah Khu tơrŭm Kuô̆k hô̆i kong têa ê IPU, Rôh hôp kong têa tơrŭm cheăng Kuô̆k hô̆i châu Á – châu Âu (ASEAP).

Rôh lăm pôu dêi kăn xiâm hnê ngăn Kuô̆k hô̆i Bulgaria troh Việt Nam a mâu hâi ki apoăng dêi hơnăm 2024 mơhno tơdroăng ki ngăn nhuô̆m, hâk vâ ƀă hiâm mơno lĕm dêi tơnêi têa ƀă kuăn pơlê Bulgaria ăm Việt Nam ƀă cho môi tơnêi têa pú hmâ khôi hmâ, tơngah, môi hiâm mơno ƀă cho môi tung mâu kong têa tơrŭm ki kal má môi dêi Bulgaria a kơpong Đông Nam Á.