Mâu hdroâng kuăn ngo rêm rơxông a Tây Nguyên hmâ tơrŭm môi tuăn, tiô kăch măng plâ xâ, ƀă lăm pơtrui tăng rup Fulro. Drêng tâng tối ‘na tơdroăng pro ôh tá tơniăn a tíu pêi cheăng dêi khu pơkuâ a Dak Lak, mâu krâ pơlê a Tây Nguyên tơtrâ, ƀă krếo mâu kuăn pơlê hdroâng kuăn ngo pôi tá môi tuăn ƀă mâu ki po tơxul tơxal.

Pôa Kră Jan Ha Xuyên, krâ pơlê kuăn ngo K’Ho, ối a thôn Dă Teh, cheăm Dă Mrông, tơring Dak Rông, kong pơlê Lâm Đồng hdrối nah tro khu Fulro pơlông djâ lăm rêh ối tung kong 12 hơnăm hlối, pôa tơchĕng tơmiât pá puât ‘nâng tro hlôp vâi pơlông djâ.

“Nah á rêh ối tung kong 12 hơnăm hlối kơklêa, pá puât, kâ mâu pôm hlá kong vâ híu rêh hâi kố hâi tá, châi tamo hên há. Drêng châ vêh a pơlê kơnôm châ Đảng, Tơnêi têa, mâu kăn kum pro tơ’lêi hlâu ăm á ai tơdroăng cheăng, kuăn ‘nĕng châ hriâm. Kơnôm ai Đảng, Tơnêi têa kum mơhno ăm a ai cheăng pêi ăm tơnêi têa, nôkố á hiăng ai hngêi trăng rêh ối tơniăn, ai rơxế to prôk lăm, tơdroăng cheăng kâ tung rơpŏng hngêi hiăng xông tơƀrê tâ.  Á ai môi tơdroăng vâ tối ƀă vâi ngoh o kuăn ngo pôi tá pro môi tiah á cho mơngế hiăng hyông troăng, nah a tiô Fulro bê 12 hơnăm ôh tá ai pơxúa ki klâi, mê a hiăng vêh ƀă ai Đảng, Tơnêi têa veăng kum. Hiăng hlo a rêm ngế thế môi tuăn môi mơno tiô Đảng, Tơnêi têa pôi tơmâng loi khu ‘mêi pơlông djâ pro tơdroăng ôh tá tro... mê cho tơdroăng ki a vâ hnê tối ăm rêm ngế.

*** Ƀă pôa Y Đoan (hdroâng M’Nông) ngế pơkuâ Măt trâ̆n ƀon R’Bút, cheăm Quảng Sơn, tơring Dak Glong, kong pơlê Dak Nông mê tối: tơkâ luâ ‘nâi to lâi tơdroăng ki xơpá, tơnêi têa nếo châ ƀlêi trâng tơniăn, hơniâp lĕm vâ vâi krâ nhŏng o hmiân tuăn pêi cheăng kâ, mơnhông pêi chiâk deăng. Xua mê, vâi krâ nhŏng o tung pơlê hdreăm hôu ó khât mâu tơdroăng bro ôh tá tơniăn tung pơlê pơla, chiâng ôh tá tơrŭm, tung tơdroăng gak kring, pro tơdjâk troh tơdroăng rêh ối kuăn pơlê:

“Xơpá khât tơnêi têa nếo châ tơleăng lĕm, hơniâp lĕm vâ hmiân tuăn pêi chiâk deăng mê vâi krâ nhŏng o a pơlê pin hdreăm hôu ó khât mâu rôh ki bro ôh tá tơniăn tơdroăng môi tiah a Čư̆ Kuiñ, kong pơlê Dak Lak. A pơlê ngin hiăng athế pơtối hôp vâ hnê tối ăm vâi krâ nhŏng o tơrŭm, pôi tá loi, pôi tá hmâng mâu ngế ki ‘mêi pơlông, hbrâ ví pôi tá ai mâu tơdroăng ki ôh tá tơniăn tung gâk kring tơniăn”.