Tối tơbleăng a rôh trâm mâ Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ Tập Cận Bình tối, mâu luât pơkâ trâm tơpui tơno, tơrŭm cheăng pơla péa pâ, tung mê ai trâm mâ mơhno túa lĕm tro, tơpui tơno pơla mâu kong pơlê tíu tơkăng kong dêi péa pâ kô veăng mơdêk tơrŭm pơla péa pâ, rơtế ƀă dêi rơpó kring gak tơniăn tung la ngiâ xua môi plâi tơnêi ai tơdroăng ôh tá tơniăn, veăng ‘no hên hnoăng tâ nếo ăm tơdroăng cheăng vâ rế rơkê dêi kuăn mơngế.

Teăng mâ mâu ngế rơkê ƀă rơxông nếo péa tơnêi têa tối kô mơ-eăm tâi ivá tơná veăng hlê plĕng tơdjuôm dêi mâu kăn xiâm péa Đảng, péa tơnêi têa ‘na mơjiâng “tơdroăng tơrŭm” ‘no hnoăng pêi ai pơxúa vâ thăm mơdêk tâ nếo tơdroăng tơrŭm pơla Việt Nam - Sinuâ’’.