Veăng a rôh trâm mâ tơpui tơno a Tơdroăng Gala kố ai 10 ngế teăng mâ ăm 30 khu pú hên, ngế krê ki kơhnâ rơkê tung Tơ’noăng tơ’noăng “Xua vâ kum mâu kơtiê – Ôh tá lôi bố pa rŏng” pơla hơnăm 2021 – 2023, ƀă mâu tơdroăng ki pơtroh ăm mâu tơdroăng ki rơhêng vâ ‘na mâu ngế ki djâ troăng ahdrối ivá khŏm mơ-eăm hluăn  ing kơtiê, pro kro mơdrŏng; tối ăm dêi rơpó mâu tơdroăng ki rơkê plĕng ‘na tơkŭm pêi pro, ‘na mơjiâng túa pêi cheăng kâ vâ kơdroh kơtiê krá ton.

Tơdroăng kố ối ai mâu phóng sự, kum ngế ki ngăn hlê plĕng tâ ‘na mâu tơdroăng ki hiăng pêi pro klêi tung tơdroăng tơ’noăng “Xua vâ kum mâu kơtiê – Ôh tá lôi bố pa rŏng” pơla hơnăm 2021 – 2023; tơdrêng amê hlối mơhnhôk mâu kong pơlê pơtối mơdêk hiâm mơno tơrŭm, hbrâ rơnáu mâu tơdroăng tơchĕng tơmiât rơkê dêi rêm ngế krê, khu pú hên ƀă rơpŏng hngêi, pro chiâng tơdroăng hơniâp ro tung tơdroăng tơ’noăng tung lâp pơlê pơla.