A tơdroăng pêi 94 kơhnâ rơkê má môi tung tơdroăng tơ’noăng khŏm ƀlêi trâng dêi khu lêng kong pơlê Kon Tum ƀă mâu kăn teăng mâ hiăng rơtế hvái ngăn, vêh mơnhên tơdroăng tơ’noăng 5 hơnăm hiăng hluâ. Tơdroăng xiâm trâm mâ tơpui tơno ƀă tơdroăng ki veăng dêi 10 khu pú hên, ngế krê tơdroăng ki má môi châ tơƀrê hiăng pêi pro châ tơƀrê ‘na hiâm mơno rŭm môi tuăn, tơmiât pêi rơkê, tơkâ hluâ pá puât, mơ-eăm pêi kêi đeăng hnoăng cheăng dêi kăn ƀô̆, mâu lêng khu lêng kong pơlê Kon Tum.

Rơtế a mê cho mâu tơdroăng ki rơrêk tung hiâm mơno ‘na tuăn  pâ khu lêng kuăn pơlê, môi tiah Khu Hnê mơhno pơkuâ cheăng lêng tơring Kon Plông ƀă tơdroăng pêi ‘’Pâ mơnê mâu ngế ai hnoăng’’, tŏng gum tăng cheăng pêi ăm mơngế kơtiê; Khu hnê mơhno cheăng lêng tơring Đăk Glei ƀă troăng pêi ‘’Tơmeăm 0 liăn’’; Thiê̆u tă lêng chuyên ngiêp Nguyễn Thị Trinh ƀă tơdroăng pêi lăm tŏng gum kuăn pơlê ai tơdroăng rêh ối pá puât.