Lối chât hơnăm hiăng hluâ, jâ Ka Joen, ối a cheăm Liêng Srônh, tơring Dam Rông (Lâm Đồng) châ hlo hên xôh tơdroăng rơnêu troăng klông ki kân dêi tơnêi têa, cho troăng klông kơxô̆ 27 tơkâ hluâ pa ngiâ hngêi dêi tơná. Troăng nếo klêi rơnêu to lâi khế mê hiăng tơplo chiâng kơhlong kơhlăng. Tơdroăng kố ai hên xôh pro tơdroăng prôk lăm vâ tê mơdró, lăm pêi cheăng kâ dêi kuăn pơlê tung kơpong trâm xahpá ó.

‘’Kong mêi chiâng to têa tê, têa lân môi tiah klôh têa, ôh tá hlo troăng prôk. Ƀă rơnó tôu mê to kơtâk tơnêi, hmốu ó ‘nâng’’.

Hên kơpong troăng klông kơxô̆ 27 xuân môi tiah mê. Troăng kân đi đo châ rơnêu laga xuân rĕng tơ’nhê, pro tơdroăng prôk lăm chiâng pá puât. Pôa Đoàn Văn Vĩnh, ối a cheăm Dà Rsal, tơring Dam Rông, Lâm Đồng tối:

“Hmâ hlo, hdrối mê châ rơnêu bro la kơ’nâi xuân rĕng tơ’nhê. Drêng rơxế kân kơtâu hluâ mê pro xơtĕng têa, mâu ngế ki vê rơxế ôh tá chiâng vê xếo mê klêh tung thông. Kơmăng droh rơtăm vê rơxế kơtâu têi, ví rơxế kân, ví tíu kơhlong chiâng tơklâm dêi pó hên ‘nâng’’.

Troăng klông kơxô̆ 27 cho troăng kân ki xiâm tơdjêp 2 kong pơlê Lâm Đồng ƀă Dak Lak, xŏn lối 200km, châ mơ’no liăn pro rêm kơpong ƀă ăm xúa a hơnăm 1998. Tiô pôa Nguyễn Văn Gia, Kăn pơkuâ ngăn ‘na troăng prôk ƀă rơxế kơtâu kong pơlê Lâm Đồng tối, kơxô̆ liăn rơnêu troăng kân kố xua Khu xiâm pơkuâ troăng prôk ƀă rơxế kơtâu xing xoăng ăm, ƀă kơxô̆ liăn rơnêu rêm hneăng sap ing 40 troh 50 rơtal liăn/hơnăm bu bê vâ kong pơlê rơnêu sap ing 8 troh 10km/hơnăm. Xua tơdroăng rơnêu tơprâ tơprŭng, iâ êt ukố umê xua mê troăng đi đo tro tơ’nhê.

“Ƀă kơxô̆ liăn xing xoăng môi tiah mê, ki nhên khât cho ôh tá tơxâng tiô pơkâ, chiâng ai tơdroăng kơpong kố klêi rơnêu mê kơpong ki ê hiăng tơ’nhê nếo. Kong pơlê xuân hiăng pơkâ sap ing ton nah, ƀă á hơnăm 2010 mê Khu xiâm pơkuâ troăng prôk ƀă rơxế kơtâu hiăng ai pơkâ kĭ troăng hơlâ mơ’no liăn pro kơpong kố ƀă kơxô̆ liăn dâng 1.400 rơtal liăn. Laga, ing mê troh nôkố, kong pơlê đi đo pâ thế ing hên troăng, Khu xiâm pơkuâ troăng prôk ƀă rơxế kơtâu ai tiâ mơnhên hên xôh tá hâi ai tŭm kơxô̆ liăn vâ mơ’no rơnêu troăng kân kố’’.

Vi ƀan kong pơlê Lâm Đồng hiăng ti tăng hên troăng hơlâ, tung mê, ai pâ thế mơjiâng troăng pêi pro vâ Lâm Đồng mơ’no liăn hdrối vâ mơjiâng pro. Laga, tiô pôa Phạm S, Kăn phŏ hnê ngăn Vi ƀan kong pơlê Lâm Đồng tối, xua tơdroăng kố tá hâi ai pơkâ xua mê pêi pro ối pá puât khât.

“Troăng klông 27 tơkâ kơpong kong pơlê Lâm Đồng cho ‘mêi ‘mâk ‘nâng tung 128 troăng kân tơnêi têa dêi Việt Nam, mê 14 hơnăm hiăng hluâ tá hâi châ mơ’no liăn rơnêu bro. Pơla kố nah, pôa Trần Lưu Quang, Ngế pro xiâm phŏ hnê ngăn tơnêi têa troh akố, Kăn hnê ngăn Vi ƀan kong pơlê Lâm Đồng xuân hiăng pơtối pâ thế, ƀă tơdroăng pâ thế kố ngin tối cho tơxâng. Tung tơdroăng kơxô̆ liăn ôh tá tŭm vâ xing xoăng mơjiâng pro tơmeăm ki xiâm tơnêi têa thế ai môi tuăn dêi Ngế pro xiâm phŏ hnê ngăn tơnêi têa pơcháu Khu xiâm pơkuâ troăng prôk ƀă rơxế kơtâu. Khu xiâm pơkuâ troăng prôk ƀă rơxế kơtâu kô ai hlá mơ-éa ôh tá tro tiah  kơxô̆ liăn ƀă pơkâ thế dêi kong pơlê, mê kong pơlê Lâm Đồng xo hdrối kơxô̆ liăn vâ rơnêu. Laga, kố cho tơdroăng tá hâi ai tung pơkâ, xua mê mơhé hiăng pâ thế laga mơni ối trâm pá’’.

Nôkố rêm hơnăm, liăn ngân tơnêi têa mơ’no hên rơtal liăn vâ rơnêu troăng klông kơxô̆ 27 kơpong tơkâ hluâ kong pơlê Lâm Đồng laga xuân ối tơ’nhê ó. Ki nhên khât ăm hlo, pro pá puât tung tơdroăng prôk lăm, tơdjâk kân troh tung mơnhông cheăng kâ – rêh ối pơlê pơla dêi Lâm Đồng ƀă kơpong Tây Nguyên.