Nâ Trần Thị Bình, a cheăm tơkăng kong Ia Dom, tơring Đức Cơ, kong pơlê Gia Lai châ rah xo mot pro kŏng nhân kúa chhá kơxu Đội 2 Kŏng ti 72, Ƀinh đoân 15 hiăng lối chât hơnăm kố. Nâ ăm ‘nâi, ƀă kơxô̆ liăn châ xo tơniăn rêm khế lối 7 rơtuh, klêi kơ’nâi hên hơnăm, rơpŏng nâ hiăng châ roê tơ’nôm chiâk, mơdêk pêi cheăng klêi kơ’nâi chôu pêi cheăng, ing mê, ai kế tơmeăm kâ kế tơmeăm ‘măn, kuăn ‘nĕng châ hriâm tâp. Xua mê, nâ đi đo hlê plĕng hnoăng cheăng dêi ngế kŏng nhân a môi tíu pêi cheăng kâ, gak kring pơlê pơla cheăm bêng:

“Cho kŏng nhân dêi tíu pêi cheăng, pêi cheăng a kơpong tơkăng kong, tâng kơbố ki tơviah mot tung kơdrum loăng, ngin kô tơbleăng ăm tíu pêi cheăng ƀă khu lêng kuăn pơlê, vâ rak vế túa pơkâ ăm gin pêi cheăng ƀă rak vế tơkăng kong”.

Ƀă a tíu tơkăng kong Čư̆ Prông, Gia Lai, kơnôm châ rah xo mot pro kŏng nhân dêi đô̆i 5, Trung đoân 710, ki tơdroăng rêh ối rơpŏng hngêi ngoh Kpuih Kớt hiăng hơ’lêh khât. Ngoh ăm ‘nâi, on veăng ngoh nếo lo ối krê, tơnêi pêi bu iâ, mê nếo ôh tá hơpok lĕm, mê tơdroăng rêh ối xơpá khât. Sap ing apoăng hơnăm 2022, tá on veăng ngoh Kớt châ mot pro kŏng nhân kúa chhá kơxu, tơdroăng rêh ối rơpŏng hngêi rế hía rế tơniăn:

“Nôkố mê on veăng má xuân hiăng chía tơniăn. Apoăng, nếo mot pro kŏng nhân, tíu pêi cheăng hiăng pro tơ’lêi hlâu ăm on veăng má. Nôkố rơpŏng pêi châ liăn tơniăn, châi tamo mê ai ƀok thái pơkeăng khu lêng. Tung la ngiâ ah, on veăng má mơ-eăm pêi pro tro tâ, hriâm ƀối tơdroăng ki rơkê sap ing kŏng nhân kúa chhá kơxu ki ton, mâu ngế ki kúa rơkê, vâ mơdêk pêi lo liăn”.

Tơkâ xŏn a 3 to cheăm tơkăng kong Ia Pnôn, Ia Nan, Ia Dom, môi iâ dêi cheăm Ia Kla ƀă pơlê kân Čư̆ Ty, tơring Đức Cơ, ƀăng deăng kơxu dêi Kŏng ti pêi cheăng tiô rơnó môi tung khu 72, Ƀinh đoân 15 dế tơrŭm ƀă 18 tíu kuăn pơlê rêh ối, cho thôn, pơlê dêi kong pơlê Gia Lai. Peăng ‘na tá tơkăng kong, kŏng ti xuân ai mâu tíu pêi cheăng pêt kơxu a 7 to cheăm ối tung 2 tơring Oyadav ƀă Bo Keo, kong pơlê Ratanakiri, kong têa Kul.

Rơtế ƀă tơdroăng ki hơ’lêh nếo, mơdêk ki tơƀrê tung pêt dêi kơdrum loăng, tíu pêi cheăng hiăng tơbleăng hên tơdroăng tŏng kum pơlê pơla, khăm pơlât, hbru pơkeăng tê kơtê, tơrŭm ƀă mâu rơpŏng kŏng nhân mơngế Xuăn ƀă kuăn pơlê hdroâng kuăn ngo rơtế tŏng kum dêi rơpó mơnhông cheăng kâ.

Thiê̆u tă Phan Tiến Toàn – Kăn phŏ pơkuâ Kŏng ti 72 Ƀinh đoân 15 ăm ‘nâi:

“Cho tíu pêi cheăng ki ối a 3 to cheăm tơkăng kong, rêm khế, tíu pêi cheăng pơtroh khu ki veăng tơrŭm rak vế gâk kring tơdroăng kal kí, gâk kring thôn pơlê a kong pơlê; pêi pro tro hnoăng cheăng pơkuâ ngăn kế tơmeăm; tơdrêng a mê hlối tơrŭm ƀă mâu khu ki séa ngăn ối pơtân. Rêm khế khu kố rak ngăn xêh dêi tíu pêi cheăng veăng rak ngăn troăng tơkăng kong, tơneăn tâp hdró. Mâu hơnăm hdrối nah, tíu pêi cheăng kố châ khu râ Đảng, khu kăn pơkuâ mơnhên tối khât”.

Ƀă túa pơkâ, “Ƀinh đoân tơrŭm ƀă kong pơlê, tơring; kŏng ti tơrŭm ƀă tơring, cheăm; khu ki pêi cheăng kâ tơrŭm ƀă thôn, pơlê; rơpŏng kŏng nhân mơngế Xuăn tơrŭm ƀă rơpŏng kuăn pơlê hdroâng kuăn ngo”, nôkố Ƀinh đoân 15 dế pêi pro hnoăng cheăng tơrŭm ƀă péa to kong têa pú cho Lếo ƀă Kul. Mâu hơnăm hdrối nah, mâu tíu pêi cheăng đi đo tơtrŏng hnê cheăng pêi, hnê ‘na kih thuât păn mơnăn, pêt kế tơmeăm, kum hdrê pêt, kum liăn ƀă hên ki ê kum kuăn pơlê mơnhông cheăng kâ rơpŏng hngêi.

Ing mê, hên rơpŏng kŏng nhân cho hdroâng kuăn ngo hiăng hluăn ing kơtiê, mơ-eăm bro kro mơdrŏng; veăng rơtế ƀă khu kăn pơkuâ cheăm pơlê mơjiâng thôn pơlê nếo a kơpong tơkăng kong.

Thiê̆u tươ̆ng Hoàng Văn Sỹ, Kăn phŏ pơkuâ ngăn Đảng ủy, kăn pơkuâ Ƀinh đoân 15 ăm ‘nâi, Ƀinh đoân nôkố ai lối 15 rơpâu ngế kŏng nhân, ki hên cho hdroâng kuăn ngo. Hơnăm 2022, pêi châ liăn rêm ngế châ 8 rơtuh liăn tung môi khế. Tơdroăng rêh ối dêi kuăn pơlê, dêi mâu ngế pêi cheăng a kơpong tơkăng kong rế hía rế châ hơ’lêh, ki rơdêi ‘na cheăng kâ gâk kring rế hía rế krá rơdêi:

“Tơdroăng tơrŭm pơla mâu hdroâng kuăn ngo, trâm mâ ‘na mơhno túa lĕm tro nếo tung pơlê pơla rế hía rế hên; hiâm mơno tơrŭm pơla kuăn pơlê ƀă kăn ƀô̆ kŏng nhân dêi ƀinh đoân mê đi đo krá ƀă krá tơniăn. Ki tơviah tâ nếo cho kuăn pơlê vâi hlê plĕng tâ tung mâu tơdroăng ki rak vế tơkăng kong tơnêi tơníu, teăm châ hlo mâu tơdroăng ki ôh tá tơniăn, teăm tối tơbleăng tơdrêng mâu tơdroăng ing mê ngin hiăng tơrŭm ƀă cheăm pơlê ƀă râ kơpêng, teăm pơkâ tơleăng mâu tơdroăng ki ôh tá tơniăn mê”.

Ƀă mâu troăng hơlâ pơkâ tơtro, troăng hơlâ tŏng kum ăm hiâm mơno kuăn pơlê, mâu ƀăng kong kơxu hiăng veăng kum pro chiâng tíu ki lĕm ngiât krá rơdêi drô kơpong tơkăng kong peăng kơnhŏng kơpong Tây Nguyên.