Kơpong Tây Bắc ƀă kơpong achê ai 14 kong pơlê, ai tíu pêi cheăng ton xŏn ki má môi ki kal ‘na cheăng kâ – rêh ối pơlê pơla, cheăng lêng, gak kring, tơpui kâ ƀă kong têa ê; ai 30 hdroâng kuăn ngo rơtế rêh ối, tung mê, kuăn pơlê hdroâng kuăn ngo châ dâng 65%, kơdrâm má môi cho mâu hdroâng kuăn ngo Mông, Tày, Thái, Mường, Nùng...

Tung 5 hơnăm hiăng hluâ, mâu pơlê kơpong kuăn pơlê hdroâng kuăn ngo kơpong Tây Bắc ƀă kơpong achê mê hiăng mơjiâng châ lối 860 troăng pêi tâi tâng kuăn pơlê gâk kring tơnêi têa, ƀă vâ chê 46.000 troăng pêi châ po rơdâ tung hên kong pơlê, kơvâ cheăng.

Hên troăng pêi châ tơbrê ai ivá troh lâp lu ó rơdêi, môi tiah: ‘’Kâu lăk ƀô̆ kheăn hnê tối thế prôk vêh lĕm, hnê mơhno, tŏng kum mơngế ki tro prôk troăng ôh tá tro nôkố hiăng vêh lĕm, khên tơnôu rêh ối tung pơlê pơla’’ dêi kong pơlê Sơn La; “Tíu tơkŭm tiô khôp ki tro luât tơniăn gâk kring pơlê pơla a pơlê Giàng Ly Cha’’ dêi kong pơlê Lai Châu; “Idrâp kơ’lêng tơniăn a Tơring Khôp  Mường Riệc” dêi kong pơlê Hoà Bình.

Pôa Giàng A Pao, ối tung khu tiô khôp Tin Lành (Bap-tis) Babtis Việt Nam a pơlê Sam Lang, cheăm Nà Hỳ, tơring Nậm Pồ, kong pơlê Điện Biên tối ăm ‘nâi:

‘’Ngin veăng tung khu pơkuâ xêh xuân ôh tá tơ’lêi hlâu, xuân ôh tá ai liăn tŏng kum ăm klâi ôh. Laga ngin ‘nâi tâng ôh tá ai khu  pơkuâ xêh kố ôh, pơlê ai hên tơdroăng ki pá tơleăng. Drêng lăm tơleăng mâu tơdroăng tơhôu kŭn xuân ai drêng tro kuăn pơlê hôu, xuân pá puât ‘nâng. Ngin hiăng mơ-eăm tiâ tối ăm kuăn pơlê, vâ kuăn pơlê ‘nâi ngin cho khu pơkuâ xêh, kuăn pơlê tơmâng, tro mê tơpui tơno môi tuăn, pro pơlĕm’’.

Tiô tơbleăng dêi kŏng an mâu kong pơlê, ing tơdroăng pêi cheăng dêi mâu troăng pêi, kuăn pơlê hiăng xing xoăng vâ chê 70.000 tơdroăng ai tơdjâk troh kring vế, gak ngăn tơniăn; hên tơdroăng ai kơnâ, kum khu cheăng séa ngăn, châ hlo 11.500 ngế...

Tung 5 hơnăm, kuăn pơlê hiăng veăng mơhnhôk mâu ngế ki pro xôi tối dêi tơná ai xôi ƀă pơtrui rup lối 900 ngế dế pơtrui rup, ví tơdroăng tơleăng, ai xôi mê châ hmuâ, châ ví; veăng pơkuâ, kheăn hôu, hnê tối, tŏng kum lối 3.700 ngế nah ai pro xôi a pơlê pơla; ko ‘nhê tah hrĭng rơpâu met karê loăng aphiê̆n... Cho um méa ki má môi tung veăng tơdroăng hbrâ mơdât ma tŭi, pôa Sồng A Dính, krâ pơlê, ngế ki kuăn pơlê loi tơngah a cheăm Hang Kia, tơring Mai Châu, kong pơlê Hòa Bình tối:

“Pin thế pơtâng tối ăm kuăn cháu pin hdrối, kuăn cháu pêi pro lĕm tro mê pin tối pơlê kơtâu nếo tơmâng. Á hnê hriâm kuăn cháu ôh tá pâk chik, ôh tá pro xôi luât...Mâu ngế ki pâk chik ôh tá vâ lôi mê á troh a hngêi mơhnhôk thế lôi pâk chik; mâu ngế pơtrui rup á xuân rơtế droh rơtăm, vâi kơdrâi, mô đô̆i hneăng hdrối nah lăm pơtâng tối... Ai ngế lăm pêi cheăng vâi, tiô khôp, vêh chôu kơƀâng tíu ki xối pleăng, á troh pơtâng tối vâi vêh pro kơƀâng tíu koh pleăng môi tiah ton’’.

Mâu krâ pơlê, kăn pơkuâ pơlê, ngế ki kuăn pơlê loi tơngah a mâu pơlê kơpong hơngế hơngo, tơkăng kong hiăng kum hên drêng pơtâng tối kuăn pơlê veăng tơdrêng tung tơdroăng gak kring tơniăn a pơlê pơla; gak kring hnoăng pơkuâ tơnêi tơníu, gak kring tơkăng kong dêi tơnêi têa. Xông tơpui a Hneăng hôp, Trung tươ̆ng Lê Quốc Hùng, Ngế xiâm phŏ ngăn Kŏng an tối rơdêi:

“Pơkâ thế mâu ngế djâ troăng ahdrối ki má môi pơtối mơnhông hiâm mơno rŭm môi tuăn tâi tâng hdroâng kuăn ngo, vâ pơtối pleăng ivá, tuăn ngôa rơkê; mơnhông tuăn pâ dêi pó, rak ngăn dêi pó, pêi cheăng môi pâ xêh laga châ tơƀrê. Tâi tâng tơdroăng pêi xêh chiâng tơdroăng ki ‘nâi pêi xêh; tiô pơkâ dêi Đảng pơkuâ djâ, khu râ kăn pơkuâ, mâu khu kŏng an, khu mô đô̆i, mô đô̆i gak tơkăng kong, măt trâ̆n, pơtâng tối khât cho khu cheăng ki djâ troăng ahdrối, mơnhên troăng prôk ăm tơdroăng mơnhông; mơjiâng tơdroăng gak kring kuăn pơlê, tâi tâng kuăn pơlê cheăng lêng, ƀă xiâm kối troh cho mơjiâng tơdroăng tâi tâng kuăn pơlê môi hiâm mơno’’.

Trung tươ̆ng Lê Quốc Hùng pơkâ thế khu kŏng an hbrâ tơrŭm ƀă khu mô đô̆i, mô đô̆i gak tơkăng kong thăm séa ngăn drô troăng tơkăng kong. Pơkâ thế kŏng an mâu kong pơlê hnê mơhno kŏng an tơring, cheăm, bêng... rơtế khu mô đô̆i, mô đô̆i gak tơkăng kong pêi pro lĕm tro tơdroăng pơtâng tối mơhnhôk khu râ kăn pơkuâ, khu pơtâng tối kuăn pơlê kơvâ lêng; achê kuăn pơlê, kum kuăn pơlê, pêi pro ‘’3 rơtế’’, ‘’4 ‘nâi’’ ƀă kuăn pơlê.

Rơtế ƀă tơdroăng mơhnhôk, kal pêi lĕm tro tơdroăng tăng cheăng pêi pơlê pơla ƀă kuăn pơlê, ƀă khu kŏng an ƀă kuăn pơlê kong têa pú hmâ Lếo.

Klăng roh kố, Khu xiâm pơkuâ Kŏng an hiăng diâp Ƀâng kheăn kơdeăn ăm 22 khu pú hên, 61 ngế krê kơhnâ rơkê tung tơdroăng tâi tâng kuăn pơlê gâk kring tơnêi têa kơpong kuăn pơlê hdroâng kuăn ngo kơpong Tây Bắc ƀă kơpong achê mê, hneăng hơnăm 2018 – 2023; diâp kơxuô tơmeăm ăm mâu kăn teăng mâ cho mơngế ki kuăn pơlê loi tơngah tung kuăn pơlê hdroâng kuăn ngo./.