VOV4.Xơ Đăng - Rơtế ƀă hnoăng cheăng rak vế tíu tơkăng kong xŏn lối 141 km tơkoh ƀă kong pơlê Mondulkiri, kong têa Kul, mố đô̆i gâk tơkăng kong dêi kong pơlê Dak Nông hiăng ai hên tơdroăng cheăng tŏng kum pơlê pơla ai pơxúa. Ôh ti xê to veăng mơjiâng pro tíu pêi cheăng kal kí a 7 to cheăm tơkăng kong, kum kuăn pơlê mơnhông mơdêk cheăng kâ rêh ối pơlê pơla, mố đô̆i gâk tơkăng kong Dak Nông ối pêi hnoăng cheăng tơpui kâ, veăng kum tơbêng tơrŭm cheăng, tơrŭm tơroâ pơla péa tơnêi têa.

Hiăng troh a peăng xêi vâ măng trê pơtrêu, mâ hâi hiăng klêh a rŏng ngo peăng tơkăng kong kong têa Kul, Đăi ŭy Tôn Đức Thái – Cheăng kal kí kăn phŏ Đông Mô đô̆i gâk tơkăng kong tíu tê mơdró ngi kong têa ê Thuận An (Mô đô̆i gâk tơkăng kong dêi kong pơlê Dak Nông) rơtế ƀă mâu mô đô̆i vêh séa ngăn roh má mơ’nui rơtế 2 tơmeăm hngêi ‘’Rŭm môi tuăn’’ vâ teăm tơdrêng diâp tung khế 6/2022.

Mê cho kơxuô tơmeăm xua Khu xiâm pơkuâ Mô đô̆i gak tơkăng kong dêi Dak Nông ƀă Vi ƀan Mât trâ̆n kong pơlê diâp ăm rơpŏng pôa Y Sa Ly Môn ƀă jâ H’Piơk – 2 rơpŏng kơtiê (hdroâng kuăn ngo M’Nông) ối a ƀon Sar Pa, cheăm Thuận An, tơring Dak Mil. Rơtế ƀă kơxô̆ liăn 100 rơtuh liăn xua 2 đông lêng tŏng kum, kăn ƀô̆, mâu mô đô̆i Đông gâk tơkăng kong tíu tê mơdró ngi kong têa ê Thuận An, Khu pơkuâ râng kơxô̆ liăn kơtiê cheăm Thuận An ối tŏng kum 15 rơtuh liăn ƀă veăng hâi pêi cheăng vâ kum 2 rơpŏng pro hngêi.

Đăi ŭy Tôn Đức Thái tối ăm ‘nâi, pakĭng tơdroăng mơjiâng pro hngêi, tíu cheăng ối hên tơdroăng pêi ki ê ki pơxúa.

‘’Ki rơhêng vâ tối, tung mâu hơnăm hiăng hluâ, pêi pro troăng hơlâ dêi Mô đô̆i gâk tơkăng kong, tíu cheăng hiăng tơdah tŏng kum hên hok tro tung cheăm. Ƀă tơdroăng veăng tơlo liăn khế dêi kăn ƀô̆, mô đô̆i vâ kum mâu muăn hok tro, tung mê tơdah păn 1 ngế o ƀă păn 6 ngế o. Đông lêng xuân hiăng tơrŭm ƀă mâu kơvâ cheăng, đoân theh pêi pro mâu troăng pêi kŭm kuăn pơlê xăm kơklêa kơdroh kơtiê, pơtih môi tiah tơdroăng ‘’ro hdrê ăm mơngế kơtiê’’, ‘’păn pu pái pơ’lêh dêi pó’’, pro tơ’lêi dêi pó ăm kuăn pơlê mơnhông mơdêk cheăng kâ, tơniăn tơdroăng rêh ối, mơ-eăm hluăn ing kơtiê’’.

Mô đô̆i gâk tơkăng kong tơrŭm khu râ kăn pơkuâ diâp hngêi tuăn pâ ăm rơpŏng jâ H’Piơk (um Phan Tân – Hlá tơbeăng Dak Nông)

Pêi pro hnoăng cheăng tung cheăm, tung mâu hơnăm hiăng luâ, Đông mô đô̆i gâk tơkăng kong Tíu tê mơdró ngi kong têa ê Thuận An hiăng pêi pro tơdroăng mơjiâng tơmeăm khoăng kal kí a cheăm, kum mơjiâng mâu chi ƀô̆, khu pơkuâ mâu thôn – pơlê krá tơniăn, thăm mơnhông cheăng kâ – rêh ối pơlê pơla.

Ki nhên, Đông lêng hiăng pơtroh môi ngế veăng khu râ kăn pơkuâ hnê ngăn cheăng Đảng, nôkố cho Kăn pơkuâ ‘na luât Hô̆i đong kuăn pơlê cheăm Thuận An; 10 ngế đảng viên veăng hôp a mâu chi ƀô̆ thôn – pơlê, 37 ngế pơkuâ mâu rơpŏng.

Thươ̆ng tă Phan Quốc Tuấn – Đông mô đô̆i gâk tơkăng kong Tíu tê mơdró ngi kong têa ê Thuận An tối ăm ‘nâi, tung mâu hơnăm hiăng hluâ, đông lêng tơmâng troh tơdroăng tơpui ƀă kuăn pơlê. Hbrâ tơbleăng ăm khu râ kăn pơkuâ hnê ngăn cheăng Đảng, khu râ kăn pơkuâ cheăm, tơkŭm po mâu khu pêi cheăng dêi Khu pơkuâ cheăng Đảng tơring, Vi ƀan tơring Dak Mil, rơtế khu kŏng an, khu lêng, mô đô̆i gâk tơkăng kong... lăm pôu ƀă diâp kơxuô tơmeăm khoăng ăm kuăn pơlê khu gâk kring tơkăng kong kong pơlê Mondulkiri, Kul.

Nếo achê kố, khu kăn ƀô̆ tơring Dak Mil rơtế mô đô̆i gâk tơkăng kong hiăng troh lăm pôu ƀă rơkâu Têt tiô khôi hmâ vâi krâ nah Chôl Chnăm Thmây a tơring Pechr Chenda, kong pơlê Mondulkiri. Đông đi đo pro tơ’lêi hlâu ăm kuăn pơlê kơpong tơkăng kong, ki hên cho a 2 ƀon Sar Pa ƀă Bu Dak, cheăm Thuận An lăm pôu dêi nhŏng o a cheăm Bu Sa Ra, tơring Pechr Chenda, kong pơlê Mondulkiri, kong têa Kul.

‘’Krê tung cheăm Thuận An ai lối 150 rơpŏng cho nhŏng o xiâm, hdroâng hdrê rêh ối peăng tá. Kuăn pơlê đi đo prôk lăm pôu dêi pó; tá peăng pin lăm peăng tâ ƀă xuân môi tiah peăng tá lăm peăng pin tung mâu roh leh, têt dêi mâu rơpŏng. Đông xuân pro tơ’lêi hlâu, hnê mơhno, pơtâng tối vâ kuăn pơlê prôk lăm tro pơkâ dêi luât, pro tơrŭm krá pơla kuăn pơlê péa tiú tơkăng kong. Ing mê, xuân pêi tơtro tơdroăng pơkuâ gâk ngăn tơkăng kong. Ing kuăn pơlê, ngin xuân ‘nâi hên tơdroăng kum tung tơdroăng pơkuâ gâk ngăn tơkăng kong dêi đông lêng’’.

Kong pơlê Dak Nông ai troăng tơkăng kong xŏn 141 km tơkăng ƀă péa kong pơlê Mondulkiri, kong têa Kul. Tíu pro đông dêi mô đôi gâk tơkăng kong xŏn lối 17 cheăm tơkăng kong, ƀă 32 hdroâng mơngế nhŏng o rêh ối ối tung 4 tơring tơkăng ƀă 4 cheăm dêi 2 tơring Pechr Chenda ƀă O Rang ối tung kong pơlê Mondulkiri, kong têa Kul.

Khu xiâm pơkuâ Mô đô̆i gâk tơkăng kong dêi kong pơlê Dak Lak đi đo hbrâ tơbleăng ăm Khu pơkuâ cheăng Đảng kong pơlê, Vi ƀan kuăn pơlê pêi pro tro tơdroăng tơpui ƀă kuăn pơlê, tơpui ƀă kong têa ê ‘na cheăng lêng. Drêng ai pơreăng COVID-19 xông tâ tú ó, kong pơlê Dak Nông hiăng tơkŭm po hên khu lăm pôu, diâp kơxuô tơmeăm, ai tơmeăm kâ, tơmeăm khăm pơlât vâ hbrâ mơdât pơreăng COVID-19.

Nếo achê má môi, klêi kơ’nâi pơreăng hiăng châ mơdât, hên khu pêi cheăng dêi kong pơlê Dak Nông hiăng lăm pôu kong pơlê Mondulkiri ƀă rơkâu Têt tiô khôi hmâ nah Chôl Chnăm Thmây. Tiô Đăi tă Phan Qúy Vỹ - Kăn phŏ pơkuâ tơdroăng cheăng kal kí kơvâ cheăng Đảng Khu pơkuâ lêng Khu xiâm pơkuâ mô đô̆i gâk tơkăng kong Dak Nông, tơdroăng tơpui kâ ƀă kong têa ê hiăng kum kal khât tung tơdroăng thăm pro ăm khu tơrŭm cheăng pơla péa tơnêi têa tối tơdjuôm ƀă péa kong pơlê Dak Nông – Mondulkiri tối krê; ki rơhêng vâ tối cho thăm pro krá tơniăn rŭm môi tuăn dêi kuăn pơlê péa tơnêi têa a troăng tơkăng kong:

‘’Nôkố dế pêi pro tơdroăng tơrŭm pro nhŏng o pơla mâu đông Mô đô̆i gâk tơkăng kong pơla mâu pơlê 2 pâ tơkăng kong. Khu pơkuâ cheăng Đảng kong pơlê hiăng hnê mơhno ƀă Vi ƀan kong pơlê xuân hiăng ai pơkâ, mâu tơring tơkăng kong ƀă mâu đông mô đô̆i gâk tơkăng kong dế pêi pro. Ing mê, thăm rŭm môi tuăn pơla péa tơnêi ki achê dêi pó dêi kuăn pơlê rêh ối a tơkăng kong. Tơdrêng amê, kĭ tơkêa tơdroăng tŏng kum peăng pú hmâ ‘na mơnhông mơdêk cheăng kâ, mơhno khôi túa lĕm tro – hnê hriâm.

Pơtih tơdroăng ‘’Kum o troh a hngêi trung’’, Mô đô̆i gâk tơkăng kong dêi kong pơlê Dak Nông tŏng kum 12 a kong têa Kul, rêm khế rêm vâi o châ tŏng kum 500 rơpâu liăn, ƀă păn mâu vâi o hriâm troh drêng mơgêi râ má pái. Ing pro nhŏng o kô hnê hriâm khôi túa; môi ivá môi hiâm 2 pâ gâk kring hnoăng pơkuâ tơkăng kong tơnêi têa hơniâp lĕm, tuăn pâ dêi pó, tơrŭm mơnhông mơdêk’’.

Quốc Học – Y Sưng Phê Ja chêh

A Sa Ly tơplôu ƀă tơbleăng