A roh tơpui tơno, kuăn pơlê tối loi tơngah ƀă pơkuâ, hnê mơhno dêi khu râ kăn pơkuâ kong pơlê Lâm Đồng tung pơla kong pơlê trâm ƀă hên pá puât, pơloăng mơnúa. Tơdrêng amê, pói vâ kong pơlê Lâm Đồng kal tơkŭm mơnhông mơdêk ó rơdêi tung kơvâ ôm hyô ƀă pêi chiâk deăng; mơdêk pơhlêh xúa kŏng ngê̆, cheăng kâ xúa kŏng ngê̆; tơtrŏng mơ’no liăn cheăng pro hngêi trăng, troăng klông, ki má lối cho mâu tơdroăng tơkêa bro troăng kân ăm phêp rơxế kơtâu têi ki xiâm môi tiah Tân Phú - Bảo Lộc, Bảo Lộc – Liên Khương ƀă Đà Lạt – Nha Trang vâ tơ’lêi hlâu tung tơdjêp kơpong, tung kơpong mơdêk chăng kâ – rêh ối pơlê pơla mơnhông mơdêk.

Pôa Trần Hồng Thái, Kăn hnê ngăn Vi ƀan kong pơlê Lâm Đồng mơnhên kong pơlê Lâm Đồng dế tung hneăng po troăng kân vâ mơnhông mơdêk, dế khŏm mơ-eăm pro troăng kân ăm phêp rơxế kơtâu têi, po troăng ngiâ peăng Hdroh Tơnêi têa. Pôa Trần Hồng Thái tối ăm ‘nâi, hơnăm nếo, kong pơlê Lâm Đồng kô pơxiâm pro troăng kân ăm phêp rơxế kơtâu têi. Ai troăng kân nếo ai tơdroăng mơnhông ó rơdêi. Tung 2 – 3 hơnăm la ngiâ, kong pơlê Lâm Đồng kô kơjo mơjiâng troăng klông.

Xuân a roh tơpui tơno, Kăn hnê ngăn Vi ƀan kong pơlê Lâm Đồng hiăng tơpui tơno ƀă mâu kăn teăng mâ kuăn pơlê ‘na mâu troăng hơlâ mơnhông kơmăi kơmok, tê mơdró, ôm hyô, pêi chiâk deăng xúa kŏng ngê̆ rơxông nếo, pơhlêh xúa kŏng ngê̆, hnê mơjiâng mơngế pêi cheăng, mơhnhôk mơ’no liăn cheăng, cheăng kâ krúa lĕm kong prâi, khăm pơlât, hnê hriâm tung la ngiâ dêi kong pơlê.

Rơtế amê, kuăn pơlê xuân ai tối troh, pâ thế, pơkâ khu râ kăn pơkuâ kong pơlê Lâm Đồng thăm pêi pro tâ mê nếo tơdroăng pơkuâ kế tơmeăm khoăng - kong prâi, mơdêk rĕng tơdroăng tăng tơnêi, xĕn kuăn pơlê rêh ối mâu tơdroăng tơkêa bro ki kal, mơjiâng hngêi ối pơlê pơla, ăm mơ-éa mơnhên xúa tơnêi ...

Tung mê, tơdroăng pơkâ ki ôh tá lĭng pêi ƀă ton xŏn, pro mơ’nhê tê kơtê tơmeăm khoăng ƀă pro hrá tơdroăng mơnhông dêi kong pơlê kal rĕng tah lôi. Pôa Păng Ting Sin, ối a pơlê kân Lạc Dương, tơring Lạc Dương, kong pơlê Lâm Đồng, tối:

‘’A pơlê kân Lạc Dương ngin ai hên pơkâ pêi bô bối ƀă ton xŏn, ai pơkâ pêi xŏn troh 20 hơnăm laga ngin xuân tá hâi pêi pro. Pói vâ kân má môi dêi kuăn pơlê cho mâu pơkâ ôh tá châ tơƀrê, ôh tá ai ivá mê thế lôi, ƀă tâng ai pơkâ mê xuân thế kal pêi pro tơdrêng hlối’’.

Lối 20 rơkong tơpui tối dêi mâu kăn teăng mâ a roh tơpui tơno hiăng tối mâu tơdroăng pá puât drêng pơkâ pêi chiâ xo tơmeăm khoăng tung kơdâm tơnêi tơdjâk troh ki pơxúa dêi kuăn pơlê tung tơdroăng pro ăm mơ-éa mơnhên xúa tơnêi; kal ai troăng prôk la ngiâ xŏn tâ vâ gâk kring ki pơxúa ăm kuăn pơlê păn ro xo têa tôu klêi roh tơdroăng hrĭng to ro xo têa tôu tung kong pơlê tro hlâ klêi pâk vaccine, pơkâ pêi bô bối, gâk kring kong prâi. Pakĭng mê, mâu kăn teăng mâ tối kal tơkŭm mơnhông péa kơvâ ki rơdêi dêi Lâm Đồng cho ôm hyô ƀă pêi chiâk deăng, ki má lối cho pêi chiâk deăng kơmăi kơmok rơxông nếo, rơkê; mơdêk tơdroăng pơhlêh xúa kŏng ngê̆.

Xông tơpui mơgêi tơpui tơno, pôa Nguyễn Thái Học, Pôu râng hnoăng Kăn pơkuâ hnê ngăn cheăng Đảng Lâm Đồng mơnhên, kăn pơkuâ kong pơlê Lâm Đồng tơmâng xo tâi tâng mâu rơkong tơpui tối, pâ thế, veăng tơpui tối dêi kăn teăng mâ mâu râ kuăn pơlê. Tơdrêng amê tơkêa kô tơkŭm tah lôi mâu tơdroăng pá puât, tơvâ tơvân kố vâ mơdêk Lâm Đồng mơnhông mơdêk tâi tâng, krá tơniăn.

‘’Á pơkâ Ƀơrô pơkuâ hnê ngăn cheăng Đảng tơrŭm ƀă Ƀơrô Vi ƀan kong pơlê tơkŭm tâi tâng mâu rơkong tơpui tối dêi mâu kăn teăng mâ ƀă tơbleăng ăm mâu khu cheăng, kơvâ cheăng, mâu tơring ai hnoăng séa ngăn tơleăng, tơbleăng tơdroăng châ tơƀrê ăm Khu hnê mơhno má môi dêi Khu pơkuâ hnê ngăn cheăng Đảng. Ai mâu tơdroăng ối tung hnoăng dêi khu râ kăn pơkuâ kong pơlê mê kô séa ngăn tơleăng, tơdroăng ki lâi ối tng hnoăng dêi Tơnêi têa mê kong pơlê kô pơkâ thế’’.

Pôa Nguyễn Thái Học, pôu râng hnoăng Kăn pơkuâ hnê ngăn cheăng Đảng kong pơlê Lâm Đồng mơnhên tơkêa rơdêi Khu hnê mơhno má môi, Khu pơkuâ pơkuâ hnê ngăn cheăng Đảng mơ-eăm tơrŭm môi tuăn, khŏm mơ-eăm, tâi hiâm mơno, tâi ivá xua tơdroăng mơnhông dêi Lâm Đồng; pêi cheăng pôu râng hnoăng cheăng, ôh tá tơdjâk pakong, pêi cheăng tơdrăng lĕm; khŏm mơ-eăm pơhlêh mâu kăn ƀô̆ pro mơdât tơdroăng mơnhông mơdêk dêi kong pơlê.