Luâ 2 khế klêi kơ’nâi tơklô̆m roh ai rơxế contaniner klô̆m a hngêi ki achê kơchơ 312, cheăm Dak Rla, tơring Dak Mil, kong pơlê Dak Nông, on veăng pôa Hoàng Văn Tuấn mot tung kơdrum deăng mơdâng pro hngêi ối. Tơdroăng ki khéa hơ’nêng xua hía 2 ngế kuăn, ing rơxế tơklô̆m xuân u ối tung tuăn ngôa kuăn pơlê. Pôa tối ăm ‘nâi:

“Á hiăng hía dêi péa ngế kuăn, troh nôkố, tung tuăn ngôa á xuân ối sĭng khéa, ôh tá xê tơ’lêi piu hiât. Nôkố pro hngêi ối akố bu pơtân tê, hngêi ton mê châi khéa ‘nâng, ôh tá chiâng ối. Vâi krâ-nhŏng o tối pro hngêi pa rŏng vâ ối, laga, pêa pa rŏng xuân cho a ƀăng tơnêi ki mê. A hiăng chu akố, ngăn tíu lâi xuân mơtiah trâm hlo dêi 2 ngế kuăn”.

Tơdroăng tơklô̆m rơxế ôh ta xê bu pro to hên ngế hlâ, tro rong, mê mơngế tung rơpŏng hngêi xuân châi hiâm mơno, ngế ki klô̆m pro vâi hlâ xuân ối chôu vế đi đo tung tuăn hiâm, thăm nếo, ai mâu ‘nâ tro kroăng phak. Ngoh Nguyễn Văn Chí, ối a cheăm Dak Buk So, tơring Tuy Đức, kong pơlê Dak Nông hmréa tối: Á tro kroăng phak hiăng châ 3 hơnăm, la tơdroăng ki á tro klô̆m vâi hlâ xuân u ối tung tuăn mơno á. Kơmăng hâi lo 15/3/2021, ngoh vê rơxế kân lăm chơ kế tơmeăm, xua kơtâu lối rĕng, ôh tá ngăn nhên troăng, hiăng klô̆m 2 ngế hok tro kơto rơxế mái on lơ trik. Ngoh Chí tối ăm ‘nâi:

“Á nếo lo ing hngêi phak, rêh ối dêi a pơlê kố. Tung pơla ối tung hngêi phak nah, tung hiâm tuăn á đi đo chôu vế tơdroăng ki pro hok tro hlâ. Tâng drêng mê nah, á ôh tá kơtâu rơxế rĕng, ôh tá préa, kơtâu hmâng to lơ vâ, mơni ôh tá ai tơdroăng ki xía vâ mê. Nôkố, hiăng lo ing hngêi phak á ôh tá khên vê rơxế xếo, á kô pêi tơdroăng cheăng pro hngêi trăng lơ lăm pro kŏng nhân a hngêi kơmăi kŏng ngiê̆ a Bình Dương lơ Sài Gòn”.

Tiô Khu hnê mơhno ‘na luât troăng prôk a kong pơlê Dak Nông, 3 hơnăm achê pơla kố, tơdroăng tơklô̆m rơxế a kong pơlê kố hiăng kơdroh. Laga, roh ki tơklô̆m pơla rơxế ƀă rơxế, rơxế ƀă kuăn mơngế xuân ối hên. Ki xiâm dêi tơdroăng tơklô̆m rơxế kố xua mơngế ki vê rơxế ƀă môi pâ xua troăng prôk tá hâi teăm châ po rơdâ, krá lĕm. Pôa Nguyễn Nhân Bản-Kăn hnê ngăn Troăng prôk-rơxế pơto kế tơmeăm, xuân cho Kăn phŏ Hnê mơhno ‘na luât troăng prôk kong pơlê Dak Nông tối tiah kố ‘na mâu troăng hơlâ ki xiâm vâ kơdroh tơdroăng tơklô̆m rơxế:

“Khu hnê mơhno ‘na Luât rak vế tơniăn troăng prôk dêi kong pơlê hiăng pơkâ hnê mâu kơ koan, khu râ cheăng, ing mê, mâu ki cheăng athế ai troăng hơlâ vâ hnê tối ‘na luât rak tơniăn drêng kơtâu rơxế, prôk lăm a drô troăng; thăm lăm ngăn hên xôh tơdroăng ki prôk lăm vâ mơdât tơdroăng ki pro xôi dro troăng prôk. Đi đo lăm ngăn, ‘mâi rơnêu troăng prôk i lĕm, ki malối, ‘mâi rơnêu a mâu tíu ki tơ’nhiê, tíu ki hding peâ pa ngiâ troăng prôk, tíu ki tơ’lêi hmâ ai xía vâ. Klêi mê, mơnhông tơdroăng ki hnê ƀai kơtâu rơxế drô troăng tro tiô luât, tơdroăng ki mơnúa kơtâu rơxế ăm i tơtro, hbru ăm ƀâng vê rơxế, séa ngăn mâu túa rơxế, thăm mơdêk tơrŭm cheăng pêi pro i lĕm tung tơdroăng rak vế ngăn tơniăn drô troăng prôk”.

Tơdroăng ki tơklô̆m rơxế cho tơdroăng ki tô tuăn dêi tâi tâng pơlê pơla, tơnêi têa, xua ing tơdroăng ki xâu xía dêi tơdroăng tơklô̆m rơxế mê cho kân ‘nâng, ai tơdjâk chiâng sĭng khéa, pa puât ăm kuăn pơlê. Vâ kơdroh tơdroăng ki tơklô̆m rơxế, tơdrêng ƀă troăng hơlâ dêi kơ koan ngăn ‘na troăng prôk, rêm ngế kal athế rak vế, pêi pro tro tiô luât. Vâ ing mê, tơná pin ki kal châ rak vế dêi châ tơná ƀă nhŏng o ki prôk a drô troăng, vâ kơdroh tah lôi ki châi hiâm tuăn, sĭng khéa xua ing tơdroăng tơklô̆m rơxế.