Tung hâi phiu xo Têt Trung thu, jâ Võ Thị Ánh Xuân, Kăn xiâm phŏ hnê ngăn tơnêi têa rơtế ƀă mâu kăn ki pêi hnoăng cheăng ƀă mâu kăn kong pơlê Dak Lak hiăng veăng pêi mâu tơdroăng: Lăm ngăn, hlo tơdroăng xah hêi ro tiô chal nah, pro on tơdrong, pơtăng râng on tơdrong, ngăn xuăng prếo ƀă hlối ngăn vâi hơdruê xuăng a kơmăng xah hêi ro khế mơniâ. Rôh kố, jâ Võ Thị Ánh Xuân, Kăn xiâm phŏ hnê ngăn tơnêi têa hiăng diâp 270 hnoăng liăn, hbru 120 toăng rơxế mái ăm hok tro kơtiê xơpá, pro 1 toăng hngêi ăm vâi hdrêng kuăn tê ƀă hbru 1.500 kơxu tơmeăm ƀă tâi tâng kơnâ lối 1 rơtal liăn.

O Nguyễn Quách Tuệ Minh, môi tung mâu vâi o hok tro châ xo tơmeăm hbru ăm mê ăm ‘nâi:

“Á phiu ro ‘nâng xua Trung thu á châ xo rơxế mai ki hbru ăm, tơdroăng mê hiăng kum á châ lăm hriâm a hngêi trung tơ’lêi hlâu tâ. A xuân tơhrâ dêi tơná kô mơ-eăm hriâm rơkê vâ mơnê hnoăng ki hiăng veăng kum dêi mâu vâi nâ, vâi miê, vâi tăm’’.

Jâ Võ Thị Ánh Xuân, Kăn xiâm phŏ hnê ngăn tơnêi têa khê̆n kơdeăn mâu tơdroăng hiăng kơdôu mơ-eăm dêi kong pơlê Dak Lak tối tơdjuôm ƀă tơring Ea HLeo tối krê tung mâu hơnăm hdrối mê hía nah hiăng tơmâng tŏng kum hên ăm mâu vâi o, vâi hdrêng. Pakĭng mê, Kăn xiâm phŏ hnê ngăn tơnêi têa púi vâ, tung la ngiâ, mâu kơ koan, tíu pêi cheăng ƀă tơdroăng cheăng pêi nhên, ai pơxúa, mơhnhôk khu râ khu cheăng kal kí, khu mơdró ƀă tâi tâng kuăn pơlê veăng tơmâng tŏng kum, teăm tơdrêng mơhnhôk hơlêm, kum vâi o, vâi hdrêng, hok tro ki kơtiê xơpá ngăn mê cho tơdroăng cheăng pêi ki kal, ton ta ah. 

Tơdrêng ƀă hâi rôh ro Trung thu tung lâp tơnêi, tung mâu hâi ki kố, hên khu tơrŭm cheăng, khu grup a Dak Lak kơhnâ mơhnhôk tăng liăn tơmeăm khoăng vâ mâu khu tơrŭm cheăng po mâu tơdroăng xah hêi ro, hbru tơmeăm ăm vâi o, vâi hdrêng a mâu pơlê kơtiê xơpá.

A plông hngêi kuăn pơlê hmâ tơkŭm hôp a ƀuôn Trăp, cheăm Ea HĐing, tơring Čư̆ Mgar, kong pơlê Dak Lak kơdrâm kơdrĕng vâi o troh tơkŭm ngăn xah hêi ro. Mâu vâi o vâi hdrêng tung pơlê châ mâu ngoh nâ đoân viên droh rơtăm dêi Tơring ƀă mâu khu veăng tŏng kum troh tơkŭm po xah hêi pơxá Eăng bâ khế mơniâ hơ-ui pâ ƀă hên tơdroăng xah hêi ro, hbru tơmeăm. Râng kơxu kơƀăn kĕo ƀă on tơdrong ki nếo châ xo hbru ăm klêi veăng xah hêi ro, o H’Trúc Êban hâk phiu tối:

“Hâi kố, a ro ‘nâng drêng châ vâi ngoh, vâi nâ troh a kố tơkŭm po xah hêi Trung thu tiah kố. Hơnăm kố ah nếo xuân púi vâ châ xah hêi tiah kố nếo, pro tiah kố ro ‘nâng’’.

            Pôa Y Tứ Niê, kăn thôn ƀuôn Trăp ăm ‘nâi hiăng ai 100 kơxu tơmeăm vâ hbru ăm vâi o, vâi muăn tung pơlê rôh kố. Hên hơnăm hdrối nah, ƀă tơdroăng veăng kum dêi mâu khu grup mâu tíu pêi cheăng khu tŏng kum, rêm rôh troh Trung thu lơ troh hâi Têt vâi hdrêng, mâu vâi o, vâi muăn châ veăng xah hêi ro tơkŭm hên kơdrâm. Tung rêm tơdroăng pêi pro, mâu đoân veăng tơrŭm ƀă tơkŭm po hlối pêi pro hên tơdroăng xah hêi ro hlối vâ hnê ăm vâi o ‘nâi rak krúa lĕm châ chăn tơná, rak vế hyôh kong prâi, pơtối xúa nếo xok ki chiâng xúa:

            “Tung mâu hơnăm achê kố châ mâu khu râ kăn cheăm, tơring kong pơlê tơmâng khât xuân môi tiah mâu ngế ai tuăn hơ-ui pâ mê ƀuôn Trăp hiăng châ tơdah xo hên tơmeăm ki hbru ăm dêi mâu khu mơdró xuân môi tiah mâu khu grup. Ing mâu tơdroăng pêi pro ti mê hiăng kum kuăn pơlê hmiân tuăn ‘na troăng rơhlâ dêi Đảng, hmiân tuăn pêi cheăng kâ. Ƀă mâu vâi o, vâi muăn hâk phiu ro hlối châ xo tơmeăm hbru ăm ki ai pơxúa’’.

            A cheăm Čư̆ Kƀang, tơring tơkăng kong Ea Sup, tơdroăng “Khế  bâ eăng tíu tơkăng kong - Trung thu troh a pơlê’’ châ mâu tíu pêi  cheăng khu ai tuăn hơ-ui tơkŭm po ƀă hên tơdroăng pêi pro ai pơxúa. Ôh tá xê to châ xah hêi ro, mâu vâi o ối châ tơkŭm xah hêi hlối châ hmâng hnê rak vế krúa lěm hyôh kong prâi hnê rak túa lĕm tro ƀă tơdroăng pơxá Rui tung tơdroăng rêh ối dêi M’Nông. Lơ môi tiah a tơring hngế hngo Krông Bông, hên khu tŏng kum lo ing pơlê kong kân Hồ Chí Minh tơrŭm ƀă Khu to tŏng veăng tơkŭm po tơdroăng Trung thu tơkŭm ƀă Khăm pơlât, xoăng pơkeăng, hbru tơmeăm ăm kuăn pơlê kơtiê ƀă vâi hdrêng a cheăm pơlê.

Ing mâu tơdroăng ki mê, rơpâu kơxu tơmeăm hiăng châ xoăng ăm vâi o, kum vâi o châ hlo tâ ro xah hêi hâi Trung thu. Malối ƀă mâu vâi o ối kơpong hngế hngo kơtiê xơpá, mâu tơmeăm hbru ăm mê mơhé kŭn la ai pơxúa kân vâ mơhnhôk hơlêm vâi o. Ngoh Y Čuôr Ƀuôn Krông, Kăn hnê ngăn Đoân droh rơtăm Hngêi trung Đại học Tây Nguyên tối:

            “Púi vâ pơtroh ăm mâu vâi o châ xah hêi ro Trung thu vâ mâu vâi o ai tơ’nôm tíu xah hêi ro vâ mơnhông tơƀrê tơ’nôm tơdroăng mơhnhôk vâi o mơ-eăm hriâm. Mơhé troh ƀă tơdroăng mê ôh tá ai hên tơmeăm ki hbru ăm la xuân hiăng veăng kum vâi o tung pơlê, malối cho mâu vâi o ki kơtiê xơpá’’.

            Mâu tơmeăm kơƀăn kĕo, tơmeăm xúa tung hriâm lơ mâu hnoăng liăn hriâm mơhé kŭn la ai pơxúa kân ‘na tuăn ngôa, thăm rế kơnía git ƀă vâi o a mâu pơlê kơtiê xơpá. Ôh tá xê to tơdroăng xah hêi kum mâu vâi o ai tơ’nôm plông xah hêi ro, rêm rôh tơkum po hêi Trung thu ƀă mâu pơlê xuân cho rôh vâ mâu vâi o tâ hlo ki hơniâp ro dêi tơdroăng xah hêi Têt trung thu tiô khôi hmâ dêi hdroâng mơngế.