Tung mâu khế hơnăm hdrối mê hía nah, kơxô̆ kăn ƀô̆, đảng viên vâi kơdrâi a Dak Lak cho thak sih, tiê̆n sih, ai tŭm hnoăng vâ tơxâng chiâng châ rah xo pro khu kăn pơkuâ, kăn hnê ngăn mâu kơ koan dêi Đảng, Tơnêi têa rêm râ rế hía rế kơdrâm. Hên mâu vâ kơdrâi cho đảng viên cho kăn pơkuâ ngăn mâu tíu pêi cheăng, tíu mơdró kâ kân, pêi chiâk pêi deăng hnối mơnhông ta tơdroăng mơnhông pêi cheăng kâ pơtối chôu ‘măn rak vế mâu khôi túa, vêa vong dêi hdroâng kuăn ngo tơná.

A tơdroăng kố, mâu ngế kăn teăng mâ vâi kơdrâi ki kơhnâ rơkê xuân hiăng vêh hơ’muăn tối, mơnhên tơdroăng ki ó rơdêi dêi 95 hơnăm hâi mơjiâng Đảng Kong san Việt Nam ƀă mâu hnoăng cheăng ki veăng gum dêi rêm râ, mâu vâi kơdrâi hdroâng kuăn ngo a kong pơlê Dak Lak. Ai mâu vâi kơdrâi đảng viên ki rơkê kơhnâ tung mâu kơvâ cheăng hiăng tram mâ, tơpui tơno ‘na pơtối mơdêk hnoăng cheăng rơkê pêi pro ahdrối, djâ troăng ăm mâu vâi kơdrâi đảng viên tung rak vế, pêi pro tiô luât mơhnhôk, hơlêm, djâ troăng ăm vâi kơdrâi ki ê, kuăn pơlê rak vế, pêi pro tiô troăng pơkâ, troăng tơdjâ dêi Đảng, luât xiâm dêi tơnêi têa. Ki rơkê plĕng tung hnoăng cheăng kal châ rĕng hlo, pơtối hnê tơdjâ, mơhriâm pơtâp, tối tơbleăng ăm mâu vâi kơdrâi ki rơkê kơhnâ vâ vâi pơtối châ mot tung cheăng Đảng, veăng pơtối gum mơdêk hnoăng cheăng dêi vâi kơdrâi tung hnoăng mơnhông cheăng Đảng, cheăng khu kăn hnê ngăn; pơtối mơdêk hnoăng cheăng, ki pôu râng tơdroăng cheăng dêi mâu ngế đảng viên tung hriâm tâp, pêi pro tiô hiâm mơno, troăng tơdjâ dêi Hồ Chí Minh. Drêng kố, Khu hnê mơhno xuân hiăng diâp reăng ƀă tơmeăm, vâ kơdeăn khĕn 50 ngế vâi kơdrâi đảng viên ki rơkê kơhnâ, ai hên hnoăng cheăng a kơvâ cheăng dêi kong pơlê Dak Lak.