VOV4.Xơ Đăng - Drêng hneăng hôp má 3, Kuô̆k hô̆i hneăng 15 po a pơlê kong xiâm Hà Nội, Vi ƀan hdroâng kuăn ngo tơkŭm po rôh trâm mâ mâu kăn Kuô̆k hô̆i cho khu ngế ki tơrŭm cheăng dêi Hô̆i đong Hdroâng kuăn ngo. A rôh trâm mâ, pôa Hầu A Lềnh, ngế xiâm pơkuâ Vi ƀan hdroâng kuăn ngo hiăng tơbleăng troh mâu kăn ‘na tơdroăng pêi pro hnoăng cheăng hdroâng kuăn ngo, troăng hơlâ tŏng kum hdroâng kuăn ngo ƀă mâu tơdroăng ki dế châ mâu kăn Kuô̆k hô̆i, kuăn pơlê tơmâng ngăn.

Tiah mê, nôkố, Vi ƀan hdroâng kuăn ngo pơkuâ, mơjiâng 38 tơdroăng tơkêa, troăng hơlâ tŏng kum hdroâng kuăn ngo vâ hơ’lêh troăng hơlâ pơkâ dêi Đảng, Tơdroăng pơkâ dêi Kuô̆k hô̆i, tơdroăng pơkâ thế dêi Chin phuh ƀă Ngế pro xiâm hnê ngăn Chin phuh, tơtrŏng troh mâu troăng hơlâ mơnhông mơdêk cheăng kâ rêh ối, hnê mâu ngế cho hdroâng kuăn ngo, troăng hơlâ tŏng kum ƀă mâu ngế ki châ kuăn pơlê loi nhuô̆m tung hdroâng kuăn ngo.

Malối, tơdroăng pơkâ tơnêi têa mơnhông mơdêk cheăng kâ rêh ối kơpong hdroâng kuăn ngo ƀă peăng kong ngo hneăng hơnăm 2021 – 2030, pôa Hầu A Lênh mơnhên tối, kố cho troăng hơlâ ki kân dêi Đảng ƀă Tơnêi têa ‘na pêi pro troăng hơlâ tŏng kum hdroâng kuăn ngo, kal pơkâ tơleăng mâu tơdroăng xơpá tơvâ tơvân vâ pêi pro tro tơdroăng kố.

Katarina Nga tơplôu ƀă tơbleăng