Kố cho môi tung mâu tơdroăng cheăng tung rôh leh khĕn kơdeăn hơnăm 2023 xua Vi ƀan Hdroâng kuăn ngo pơkuâ po, tơrŭm ƀă Khu ngăn hnê hriâm ƀă hnê mơjiâng tuăn ngoâ rơkê, Tíu xiâm Đoân Droh rơtăm Kŏng san Hồ Chí Minh tơkŭm po tung 2 hâi lơ 25 ƀă 26/12.

Hơnăm kố, tâi tâng kơxô̆ hok tro, sinh viên, droh rơtăm hdroâng kuăn ngo châ rah xo khĕn kơdeăn cho 143 ngế o ối tung 51 hdroâng kuăn ngo, tung mê ai 12 hdroâng kuăn ngo ối tung mâu hdroâng kuăn ngo ki xơpá. Mâu vâi o cho mâu hok tro hdroâng kuăn ngo châ kâ pri ối má Môi, má Péa, má Pái tung hneăng tơ’noăng hok tro rơkê lâp tơnêi têa.

Rôh tơ’noăng khoa hok kih thuât râ tơnêi têa, lơ châ xo mot hriâm tơdrăng tung mâu hngêi trung đăi hok, hok viê̆n, ai điêm hên ing 28 tơngi klêng tiô tơkŭm pái môn rah xo mot hriâm đăi hok; cho mâu droh rơtăm hdroâng kuăn ngo ki rơkê tung mâu kơvâ cheăng lơ mâu droh rơtăm ki kong pơlê tơbleăng, pơkâ.