A hneăng hôp kố, Hô̆i đong kong pơlê Dak Lak séa ngăn, tơpui tơno ƀă pơkâ mâu khu tơdroăng ki kal troh tơdroăng pêi cheăng kăn ƀô̆ thế pơtê cheăng ƀă rah xo tơ’nôm Kăn cheăng tung Vi ƀan kong pơlê hneăng má X, hneăng hơnăm 2021 – 2026 ƀă tơkŭm po xo phĭu ki loi tơngah ƀă ngế pro kăn xua Hô̆i đong kong pơlê Dak Lak hneăng má X, hneăng hơnăm 2021 – 2026 tiô pơkâ a Pơkâ 96/2023 dêi Kuô̆k hô̆i ƀă mâu tơdroăng xiâm ki kal ki ê.

Xông tơpui pơxiâm po hneăng hôp, jâ Huỳnh Thị Chiến Hoà, Kăn hnê ngăn Hô̆i đong kong pơlê Dak Lak tối nhên, Hneăng hôp tơdroăng cheăng hriăn plĕng roh má 10 kô séa ngăn, pơkâ hên tơdroăng ki xiâm, tung mê ai tơkŭm po roh hôp xo phĭu ki loi tơngah ƀă ngế to pro kăn xua Hô̆i đong kong pơlê rah xo vâ pêi pro Pơkâ kơxô̆ 96 ƀă séa ngăn, pơkâ mâu tơdroăng xiâm ki kal pơkâ ai hnoăng ƀă rơtế Vi ƀan kong pơlê tơleăng mâu tơdroăng ki ai; tơxâng pơkâ tơdroăng cheăng kăn ƀô̆ ƀă hnoăng mơnhông cheăng kâ, rêh ối pơlê pơla tung kong pơlê.