Hneăng tơ’noăng ai 19 khu ƀă vâ chê 190 ngế hiăng veăng tơ’noăng, mơhno ki hlê plĕng ƀă ki mơ-eăm tung tơdroăng cheăng hnê mơhnhôk. Ai 3 tơdroăng tơ’noăng, mê cho: koh hmât, tơdroăng hlê plĕng tung tơpui mơnhên mâu tơdroăng ƀă pro pơro ‘na hnê mơhnhôk rơkê, mâu đô̆i ki tơ’noăng hiăng tơ’noăng khât, ‘nâi hbrâ tŭm hdrối, hâk vâ.

Khu po tơ’noăng, mâu khu hiăng hbrâ kơtăng, bro nhên, hên todroăng, mâu tơdroăng pêi pro hên túa. Tung mê, peăng tối mơnhên mâu tơdroăng ƀă pro pơro ki hriăn chêh xêh, pơxiâm ing tơdroăng cheăng hnê mơhnhôk kuăn pơlê. Khu tơkŭm po hiăng diâp pro ăm 11 khu ki rơkê, 3 pri mơhnhôk ăm mâu khu ki ai túa  tơ’noăng krê xêh, pro pơro hơniâp tro, ƀă tơdroăng koh apoăng tơviah hôm. Tung mê, Khu ngăn túa lĕm tro, Tơ’noăng ivá ƀă Ôm hyô Dak Lak châ ối má môi.