Kơxo hâi lơ 30/12, pôa Nguyễn Thiên Văn, Kăn phŏ hnê ngăn Vi ƀan kuăn pơlê kong pơlê Dak Lak hiăng kĭ  hlá mơ-éa kơxô̆ 12306 pơtroh ăm Khu ngăn ‘na Chiâk ƀă Mơnhông thôn pơlê, khu ngăn Tê mơdró, Khu xiâm ngăn pơkeăng pơlât, Kŏng an kong pơlê, ƀă Vi ƀan Kuăn pơlê pơlê kong kơdrâm Buôn Ma Thuột pơkâ thế mơnhên tơdroăng hmŏng to tâm trếo pơkeăng ki mơdât ôh tá chiâng xúa a Dak Lak.

Tơdjâk troh ƀai chêh dêi VOV ai pơxá: “Hmŏng to tâm trếo pơkeăng ki mơdât ôh tá chiâng xúa a Dak Lak” Kơ koan khu râ pơkuâ cheăng ôh tá vâ tơmâng hnoăng  hvât, hnoăng pôu râng” . Ing mê, Vi ƀan kuăn pơlê kong pơlê Dak Lak pơkâ thế Khu ngăn ‘na Chiâk deăng  - Mơnhông thôn pơlê pơkuâ, tơrŭm ƀă mâu kơ koan tơdjâk troh mê cho Khu ngăn Tê mơdró, khu ngăn pơkeăng pơlât, Kŏng an kong pơlê, Vi ƀan kuăn pơlê dêi pơlê kong kong kơdrâm Buôn Ma Thuột ƀă mâu tíu pêi cheăng khu râ pơkuâ cheăng tối tơbleăng ‘na tơdroăng cheăng rak ngăn hôm pêi krúa kế kâ ƀă 6 tíu mơjiâng pro hmŏng to ki ai tâm trếo ‘mêi (pa gong inâi ki châ ăm phêp xúa) tơdroăng séa ngăn, tăng ‘nâi xiâm mơjiâng pro, tơvêh tơmeăm ƀă tơdroăng hiăng pêi pro ta troh nôkố.  

Vi ƀan kuăn pơlê kong pơlê Dak Lak  pơkâ thế mâu kơ koan khu râ pơkuâ cheăng tơbleăng nhên kơxô̆ hlá mơ-eá mơnhên ăm phêp mâu tíu pêi cheăng  ai tiô tơdroăng pơkâ ăm phêp pêi krúa kế kâ, mơdró hmŏng to tung kong pơlê, hlối pâ thế tăng troăng hơlâ rak ngăn mâu tíu mơjiâng pro, tê mơdró  hmŏng to tung la ngiâ.