Tơdjâk troh tơdroăng tơklâm rơxế ki rơ-iô ó, a tơring Chư Pưh, kong pơlê Gia Lai pro 3 ngế  tung Kâu lăk bô̆ kơtú ƀa long Hoàng Anh Gia Lai hlâ, hâi lơ 13/8, pôa Khuất Việt Hùng- phŏ pơkuâ Vi ƀan rak tơniăn troăng prôk tơnêi têa pêi cheăng ƀă Vi ƀan tơring Chư Pưh ‘na tơdroăng rak tơniăn drô troăng kân kơxô̆ 14 tơkâ luâ kong pơlê ƀă lăm pôu hơlêm rơpŏng ki ai ngế hlâ.

Tiô tối tơbleăng, sap apoăng hơnăm troh nôkố, a tơring kố hiăng ai 13 hdrôh tơklâm rơxế, pro 10 ngế hlâ, 4 ngế tro rong. Ki vâ tối, ki hên mâu rôh tơklâm rơxế kơpêng 31km pơla troăng kân kơxô̆ 14 ki tơkâ luâ tơring. Tơbleăng a rôh pêi cheăng, pôa Khuất Việt Hùng pơkâ thế Vi ƀan tơring Chư Pưh mơhnhôk khu râ, kơvâ cheăng, mơngế pêi pro tơdroăng tŏng kum vâ tơkâ luâ xơpá a troăng prôk hdrối kố nah, rĕng  séa ngăn; mâu khu râ pơkuâ cheăng kong pơlê Gia Lai tơleăng mơnhên klêi mâu tơdroăng ki tro xôi.

Tơring kal thế rĕng krâ camera séa ngăn drô troăng. Vi ƀan rak  tơniăn troăng prôk púi vâ kong pơlê Gia Lai pơkâ mâu troăng rơhlâ ton ta ah ‘na pơkâ kuăn pơlê ối drô péa pâ troăng kân kơxô̆ 14 vâ tơniăn ‘na troăng prôk.