VOV4.Xơ Đăng - Pơtối tơdroăng pêi cheăng Rôh hôp má 10, kơxo lơ 25/4, Vi ƀan pơkuâ Kuô̆k hô̆i ăm rơkong veăng tơpui tối ‘na hlá mơ-éa tối tơbleăng dêi Chin phuh ‘na klêi kơ’nâi pêi pro kơdĭng, hbrâ mơdât mơhrê liăn ngân tê kơtê hơnăm 2021. Tung hnoăng cheăng hbrâ rơnáu ‘no liăn cheăng, ai hên tơdroăng tơkêa tá hâi ai tŭm hlá mơ-éa ‘no liăn, ôh tá ai tŭm tơdroăng ki vâ châ xing xoăng liăn, mê chiâng tơdjâk troh ôh tá pêi pro klêi mâu tơdroăng pơkâ mơ’no sap ing apoăng; tơdroăng ki séa ngăn, pơtroh, ‘mot tơ’nôm kơxô̆ liăn ăm mâu tơdroăng tơkêa ‘no liăn ăm mung, ai tơdroăng rơhêng vâ xúa liăn vâ pêi pro klêi mâu tơdroăng tơkêa tá hâi châ pêi pro teăm tơdrêng, rơkê.

Kố cho tơdroăng ki tá hâi pêi pro klêi, ối ton hên hơnăm, Chin phuh kal pơkâ tơleăng tơdrêng. Tung hơnăm 2021, 9 khu xiâm ƀă 21 kong pơlê xuân tá hâi xing xoăng liăn vâ pêi cheăng tơdjuôm; ai 10 kong pơlê tá hâi xoăng tâi kơxô̆ liăn, kuăn pơlê rơhêng vâ mâu tơdroăng ki tá hâi teăm tơleăng klêi tung pêi pro troăng hơlâ luât ‘na pêi pro kơdĭng, hbrâ mơdât mơhrê liăn tê kơtê châ tơpui tơno tiô túa ki hlê plĕng a rôh hôp dêi Vi ƀan pơkuâ Kuô̆k hô̆i hâi kố.

Katarina Nga tơplôu ƀă tơbleăng