VOV4.Xơ Đăng - Rôh hôp má 11 dêi Vi ƀan pơkuâ Kuô̆k hô̆i tiô tối hdrối kô po sap ing kơxo lơ 11 troh lơ 20/5 kô ăm rơkong tơpui tối ‘na hên tơdroăng ki kal. Mê cho séa ngăn, pơkâ tơdroăng ki mơjiâng pơlê kân Phương Sơn ối tung tơring Lục Nam ƀă mơjiâng pơlê kân Bắc Lý ối tung tơring Hiệp Hòa, kong pơlê Bắc Giang; tơdroăng ki hơ’lêh xúa kong, tơnêi kong ƀă tơnêi klâng pêt báu sap ing péa rơnó tơngi klêng dêi Tơdroăng tơkêa mơjiâng pro troăng prôk tơdrăng Bắc – Nam peăng mâ hâi lo hneăng hơnăm 2021 – 2025 (tâng ai tŭm tơdroăng).

Vi ƀan pơkuâ Kuô̆k hô̆i kô séa ngăn mơjiâng péa to pơlê kân ối tung kong pơlê Bắc Giang

Vi ƀan pơkuâ Kuô̆k hô̆i ăm rơkong tơpui tối ‘na hlá mơ-éa tối tơbleăng mơnhên ‘mot tơ’nôm klêi kơ’nâi pêi pro hnoăng cheăng túa pơkâ mơnhông mơdêk cheăng kâ rêh ối pơlê pơla ƀă liăn ngân tơnêi têa mâu khế apoăng hơnăm 2022; Séa ngăn tơdroăng ki tiô tối túa pơkâ xing xoăng liăn ngân tơnêi têa hneăng hơnăm 2021 – 2025 ƀă hơnăm 2022 ăm mâu khu xiâm, kơ koan tơnêi têa ƀă kong pơlê pêi pro 03 tơdroăng ki kal dêi tơnêi têa; ‘mot tơ’nôm túa pơkâ liăn ngân tơnêi têa hơnăm 2022 tung tơnêi têa xing xoăng ăm mâu khu xiâm, kơvâ cheăng, kong pơlê.

Katarina Nga tơplôu ƀă tơbleăng