Tung kơxo kố, Vi ƀan pơkuâ cheăng Kuô̆k hô̆i veăng hnê tối tơdroăng tơkêa Luât chêh ‘măn (‘mâi hơ’lêh). Luât chêh ‘măn châ  pơkâ a hơnăm 2011 hiăng pro xiâm ki tro luât ki kal vâ môi tuăn troăng rơhlâ ki tơtro tung tơdroăng chêh ‘măn mâu tơdroăng kal tung lâp tơnêi têa.

Xuân tung hâi kố, Vi ƀan  pơkuâ cheăng Kuô̆k hô̆i ăm veăng hnê tối tơdroăng tơkêa Luât tơkŭm cheăng dêi Hngêi tơleăng kuăn pơlê ki (‘mâi hơ’lêh); ăm hnê tối ‘na tơdroăng hbrâ rôh hôp má 6 dêi Kuô̆k hô̆i. Vi ƀan  pơkuâ cheăng Kuô̆k hô̆i xuân séa ngăn tối tơbleăng dêi Chin phuh, Hngêi tơleăng kuăn pơlê, Tíu xiâm séa ngăn arak luât kuăn pơlê, Tíu xiâm riân ngăn liăn ngân tơnêi têa ƀă tơbleăng dêi Kăn xiâm chêh tôm xo rơkong Kuô̆k hô̆i tơkŭm tâi tâng tơdroăng séa ngăn ‘na pêi pro mâu tơdroăng pơkâ dêi Kuô̆k hô̆i hneăng 14 ‘na séa ngăn chuyên đề, kơ-êng ƀă tơdroăng pơkâ dêi Kuô̆k hô̆i ‘na séa ngăn chuyên đề, kơ-êng sap apoăng pêi cheăng dêi hneăng má 14 troh tâi rôh hôp má 4.