VOV4.Xơ Đăng - Kơxo lơ 11/7, pơxiâm po roh hôp má 13 dêi Vi ƀan Pơkuâ Kuô̆k hô̆i. Xông tơpui pơxiâm po roh hôp, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, roh hôp kố, Vi ƀan Pơkuâ Kuô̆k hô̆i kô mơgêi hneăng hôp má 3 ƀă tơpui tơno ‘na troăng apoăng ‘na tơdroăng hbrâ hneăng hôp má 4 dêi Kuô̆k hô̆i. Roh hôp xuân tơmâng xo rơkong tơpui apoăng ‘na hbrâ rơnáu ăm Hneăng hôp má 4 tiô tối hdrối tơkŭm po a khế 10 hơnăm kố.

Ki xiâm hneăng hôp kố cho tơdroăng mơjiâng luât, séa ngăn tơbleăng ăm pêi pro hên tơdroăng tơkêa bro luât. Klêi kơ’nâi leh pơxiâm po, 100% khu tơrŭm Vi ƀan pơkuâ Kuô̆k hô̆i ai mâ môi tuăn hiăng tơbleăng ăm pêi pro Pơkâ ‘na tơdroăng pơkâ troăng hơlâ pơ’lêh xiâm kối xúa kong, tơnêi kong ƀă tơnêi pêt báu dêi Tơdroăng tơkêa bro mơjiâng pro troăng kân ăm phêp rơxế kơtâu têi Peăng kơnhŏng – Pá hdroh peăng mâ hâi lo hneăng hơnăm 2021 – 2025.

Tâi tâng a roh hôp

Pơtối mê, Vi ƀan pơkuâ Kuô̆k hô̆i ăm phêp pơ’lêh xiâm kối xúa tơnêi kong tơnêi pêt báu 2 rơnó tơngi klêng tâk tơ’nôm tâng pơchông ƀă Pơkâ dêi Kuô̆k hô̆i ƀă pơ’lêh xiâm kối xúa kong hding ƀă rak kơnhŏng têa vâ teăm pêi pro tro tơdrêng pơkâ. Tơdrêng amê pơkâ thế Chin phuh pro kêi đeăng hô sơ pơ’lêh vâ tơbleăng Kuô̆k hô̆i a hneăng hôp má 4 la ngiâ.

A Sa Ly tơplôu ƀă tơbleăng