Kơxo kố, lơ 23/9, a Hngêi Kuô̆k hô̆i, Vi ƀan pơkuâ Kuô̆k hô̆i mot roh má 2 dêi roh hôp má 37. Tung kơxo kố, Vi ƀan pơkuâ Kuô̆k hô̆i tơpui tung tơdroăng tơkêa bro Luât hnoăng mơhá tê tơmeăm ki phá tơ-ê. Tơdroăng ki tơtrŏng má môi, tơdroăng tơkêa bro Luât hnoăng mơhá tê tơmeăm ki phá tơ-ê pơkâ: hnoăng tê tơmeăm ki phá tơ-ê ƀă drôu, ƀiê̆r kô pơxiâm xúa kơlo hnoăng mơhá tâk đi đo sap ing hơnăm 2026 ƀă troh hơnăm 2030 kô chiu hnoăng mơhá tâk troh 100%.

A hôp tơpui tơno veăng tơpui Tơdroăng tơkêa bro Luât hnoăng mơhá tê tơmeăm ki phá tơ-ê (‘mâi rơnêu) xua Khu tơrŭm Tê mơdró mơ’no liăn cheăng kong têa ê tơrŭm ƀă hlá tơbeăng Đại biểu Nhân dân tơkŭm po nếo achê kố, mâu ngế rơkê, kăn teăng mâ khu tê mơdró hiăng tơpui tối pâ thế vâ tơniăn hnoăng pơxúa pơla Chin phuh ƀă khu tê mơdró.

Pơtối mê, mâu khu tê mơdró môi tuăn ƀă troăng tơmiât dêi Đảng ƀă Tơnêi têa tung tơdroăng xúa troăng hơlâ hnoăng mơhá tê tơmeăm ki phá tơ-ê vâ rak vế ivá kuăn pơlê, kơdroh xúa mâu tơmeăm ki ‘nêk ivá châ chăn môi tiah drôu, ƀiê̆r, hât.