VOV4.Xơ Đăng - Kơxo lơ 27/6, pôa Trần Quang Phương, Kăn xiâm phŏ hnê ngăn Kuô̆k hô̆i hiăng pêi cheăng ƀă khu râ kăn pơkuâ kong pơlê Khánh Hòa ‘na tơdroăng tơleăng săm tối, săm tơkêng. Tiô tơbleăng, sap ing hơnăm 2016 troh 2021, tơdroăng săm tối săm tơkêng tung kong pơlê Khánh Hòa tâk hên tâng pơchông ƀă lối 150% tâng pơchông ƀă 5 hơnăm hdrối mê. Hneăng kố ai lối 6.600 hlá mơ-éa đơn, tung mê 70% cho hlá mơ-éa đơn săm tối, ki ê cho mơ-éa đơn săm tơkêng.

Tâi tâng roh pêi cheăng

Xiâm kối cho xua kong pơlê Khánh Hòa dế pêi pro hên tơdroăng tơkêa bro kân, kơxô̆ rơpŏng kuăn pơlê, ƀăng tơnêi tro tơdjâk hên laga pơkâ ‘na troăng hơlâ, chêl thiăn tá hâi tơtro tơdroăng ki ai khât. Tơdrêng amê, tơdroăng pơkuâ tơnêi têa dêi khu râ kăn pơkuâ tá hâi krá tơniăn; mâu kơ koan, tíu cheăng tơleăng hlá đơn dêi kuăn pơlê tá hâi teăm tơdrêng.

Hneăng hơnăm 2016 – 2021, kong pơlê Khánh Hòa hiăng tơdah vâ chê 13 rơpâu roh ngế kuăn pơlê, ƀă vâ chê 9.800 roh tơdroăng, tung mê ai 133 khu kơdrâm mơngế, kơxô̆ roh tơdroăng kơdrâm mơngế pro tơvâ tơvân.

A Sa Ly tơplôu ƀă tơbleăng