VOV4.Xơ Đăng - Pơtối tơdroăng roh hôp má 11, hâi kố, lơ 12/5, Viƀan pơkuâ Kuô̆k hô̆i tơpui ‘na tơdroăng tơbleăng Kuô̆k hô̆i séa ngăn, pơkâ troăng hơlâ mơ’no liăn tơdroăng tơkêa bro troăng klông pakĭng 4 kơpong pơlê kong xiâm Hà Nội; Tơdroăng tơkêa bro troăng pakĭng 3 pơlê kong kân Hồ Chí Minh. Tơdroăng tơkêa bro troăng pakĭng 4 kơpong pơlê kong xiâm Hà Nội xŏn 112,8 km ƀă tâi tâng kơxô̆ liăn mơ’no 85 rơpâu 813 rơtal liăn. Tơdroăng kal vâ xúa tơnêi dêi tơdroăng tơkêa bro troăng kân dâng 1 rơpâu 341 hectar. Troăng kân pakĭng 4 châ xo tơnêi tiô troăng kêi đeăng ƀă kân rơdâ sap ing 90 troh 135 met. Chin phuh pơcháu Viƀan pơlê kong kân Hà Nội pôu râng hnoăng cheăng cho kơ koan ki tơkŭm po tơdroăng tơkêa bro, tơniăn tâi tâng, tơdâng tơ’mô tơdroăng tơkêa bro troăng kân. Tơdroăng tơkêa bro troăng kân pakĭng 3 pơlê kong kân Hồ Chí Minh ai tâi tâng kơlo mơ’no liăn lối 75 rơpâu 300 rơtal liăn tơkâ hluâ pơlê kong kân Hồ Chí Minh, Đồng Nai, Bình Dương, Long An tâi tâng xŏn vâ chê 92 km. Troăng kân kố ối tung khu tơdroăng tơkêa bro ki kal Tơnêi têa, pêi pro sap hơnăm 2022 troh 2027.

A Sa Ly tơplôu ƀă tơbleăng