Pôa Nguyễn Phú Trọng tối nhên, troăng rơhlâ tơpui kâ má môi dêi Việt Nam cho tơniăn, pơkuâ dêi, hơniâp, tơrŭm tơrôa ƀă mơnhông mơdêk; hên túa, hên troăng rơhlâ tơrŭm cheăng tơpui kâ. Pôa Nguyễn Phú Trọng ƀă pôa Joe Biden vâ môi tuăn tiah kố ki khât gá hiăng ăm hlo mâu tơdroăng ki kal má môi ƀă tơdroăng mơnhông tơrŭm cheăng pơla Việt Nam - Mih cho tơdroăng nhoăm tŭm tâi tâng mâu tơdroăng ki xiâm troăng rơhlâ tơrŭm pơla péa tơnêi têa.

Pôa Nguyễn Phú Trọng tối nhên ki hlê plĕng dêi rơpó, tơdroăng rêh ối dêi rơpó, nhoăm mâu tơdroăng ki pơxúa tơxâng dêi rơpó ƀă ôh tá veăng tơmâng a tơdroăng cheăng kal xiâm dêi rơpó đi đo ai pơxúa ki kal. Kăn xiâm hnê ngăn Đảng khĕn kơdeăn tơdroăng tơhrâ pơla péa kăn xiâm péa tơnêi têa ‘na tơbleăng tơdjuôm tung mơdêk ki kal tơrŭm cheăng pơla Việt Nam - Mih tâk tơrŭm cheăng kâ tung Tŭm tơdroăng xua vâ Hơniâp lĕm, Tơrŭm tơrôa ƀă hlối mơnhông krá tơniăn.

Ing mê, pôa Nguyễn Phú Trọng tối nhên mâu troăng rơhlâ ki kân vâ mơdêk tơrŭm cheăng pơla Việt Nam - Mih. Tung mê, ai tơdroăng pơtối mơdêk hlê plĕng dêi rơpó, pêi mâu tơdroăng pơkâ tiô troăng  rơhlâ, rak tơniăn ton, trâm mâ, tơrŭm tơrá mâu kăn xiâm, mâu kơvâ cheăng, rêm râ, trâm tơpui tơno ƀă kuăn pơlê.