Péa pâ vâ môi tuăn tiah kố, tung lối 2 hơnăm hdrối, Khu xiâm kŏng an péa tơnêi têa hiăng tơrŭm pêi cheăng tơƀrê tung hbrâ mơdât, tơplâ ƀă mâu ki ai xôi, veăng rak tơniăn cheăng kal kí, rak tơniăn pơlê pơla tơrêm kong têa. ‘Na tơrŭm cheăng tung la ngiâ, Khu xiâm kŏng an péa tơnêi têa tối kô pơtối tơrŭm kring vế tơniăn, pro tơniăn mâu hneăng hôp ki kal tơkŭm po a tơrêm tơnêi têa, pêi tro tơdroăng cheăng dêi kuăn pơlê; pơtối tơrŭm tơplâ ai pơxúa ƀă mâu ngế ai xôi tơkâ luâ tơnêi têa môi tiah xôi kroăng phâk, ma tŭi, cheăng kâ, tê mơdró mơngế, xôi hêak pơloi ing măng hyôh phôn, măng internet.

Kơxê hâi ki mê, pôa Tô lâm hiăng koh tơpui tơno ƀă pôa Thái Kỳ, Ngế pơkuâ Ƀơrô xiâm Đảng Kŏng sản Sinuâ. A rôh tơdah pôa Thái Kỳ khĕn kơdeăn tơdroăng mơnhông tơrŭm cheăng pơla péa Đảng, péa tơnei têa tung tâi tâng mâu kơvâ cheăng ing tơdroăng tơrŭm tung tŭm kơvâ.