Tối tơbleăng a rôh hôp, pôa Nguyễn Chí Dũng, Ngế xiâm ngăn tơdroăng Pơkâ ƀă ‘no liăn cheăng ăm ‘nâi, tơdroăng cheăng kâ rêh ối khế 9, sap khế tơpah troh khế tơchên ƀă 9 khế hơnăm 2023 pơtối pêi tiô troăng  mơ-eăm mơnhông, ƀă  hiăng mơhno 10 tơdroăng ki tơ ƀrê tung mê tối nhên: Mơnhông cheăng kâ, pái khế pơtối kơ’nâi hên tâ pái khế hdrối, riân tơdjuôm 9 khế tâk 4,24%, tung khu kong têa pêi cheăng tâk hên  tung kơpong ƀă lâp plâi tơnêi.

Mâu kơvâ cheăng, tơdroăng cheăng ki xiâm ‘mâi mơnhông, mơdêk tơniăn, malối cho tơdroăng cheăng ‘na kơmăi kơmok pơtối tâk nếo. A hneăng hôp mâu kăn mâu khu xiâm kơvâ cheăng kong pơlê khĕn kơdeăn khât tơdroăng cheăng hnê mơhno pơkuâ pêi kơtăng, nhên khât dêi Chin phuh, Ngế pro xiâm hnê ngăn tơnêi têa teăng tối nhên mâu tơdroăng tô tuăn dêi mâu kong pơlê.

Tối mơgêi a rôh hôp, pôa Phạm Minh Chính, Ngế pro xiâm hnê ngăn tơnêi têa hiăng tối nhên tơdroăng hiăng pêi pro, xiâm ki hâi pêi pro, ki pá tơvâ tơvân ƀă ƀai hriâm túa pêi cheăng. Tung la ngiâ, Ngế pro xiâm hnê ngăn tơnêi têa pơkâ thế rêm râ, mâu kơvâ cheăng, kong pơlê thế hbrâ nhên mâu tơdroăng vâ pêi, chêh hdrối tơdroăng vâ pêi, troăng rơhlâ hbrâ ví pêi tơ ƀrê, pơtối mơ-eăm pêi tiô pơkâ tâi tâng cho tơniăn cheăng kâ kân, séa ngăn ki ôh tá kơnâ liăn, pơtối mơdêk cheăng kâ, tơniăn tơdroăng rêh ối kuăn pơlê; rak tơniăn kal kí -rêh ối pơlê pơla tơniăn lĕm.