Tơdroăng kố xua Khu xiâm ngăn ‘na cheăng pêi - mô đô̆i rong ƀă pơlê pơla tơrŭm cheăng ƀă Khu xiâm ngăn ‘na pơkeăng ƀă khăm pơlât ƀă rak ngăn ‘na liăn ngân kum pơlê pơla dêi Nhuk, Kăn teăng mâ kong têa Nhuk tơkŭm po koh tơbâ 50 hơnăm tơrŭm cheăng pơla Việt Nam ƀă Nhuk.

Tơrŭm cheăng pơla Việt Nam ƀă Nhuk hiăng pơxiâm pêi pro ki păng ‘nâng sap ing hơnăm 1992 nah, ing mê, pơtối châ pơtâp sinh Việt Nam châ pơtâp tơdroăng ki rơkê ‘na pêi cheăng a kong têa Nhuk. Troh hâi lơ 1/7/2019, Khu xiâm ngăn ‘na mô đô̆i rong, pơlê pơla Việt Nam, Khu xiâm ngăn’na luât, Khu xiâm ngăn ‘na tê mơdró kâ, Khu xiâm ngăn ‘na pơkeăng ƀă khăm pơlât ƀă tŏng kum pơlê pơla ƀă kơ koan kan sat kong têa Nhuk hiăng rơtế dêi pó kĭ tơkêa tơdroăng ki tơrŭm ‘na pêi cheăng, ki rơkê plĕng ‘na pêi cheăng vâ thăm mơdêk tŏng kum ăm mơngế pêi cheăng, tŏng kum tơ’lêi hlâu ăm mâu khu ngế ki pơkâ xo, mâu ngế ki tơdah mơngế pêi cheăng tro tiô luât xiâm dêi 2 pâ tơnêi têa.