VOV4.Xơ Đăng - Kơxo lơ 18/5, a Rơlốu Tuần Châu, pơlê kong kơdrâm Hạ Long, kong pơlê Quảng Ninh, Khu xiâm pơkuâ ‘na pêi chiâk deăng ƀă mơnhông mơdêk thôn pơlê Việt Nam tơrŭm ƀă Khu xiâm pơkuâ ‘na pêi chiâk deăng kơpong pêi chiâk deăng kong têa Sinuâ ƀă Viƀan kong pơlê Quảng Ninh tơkŭm po Leh ‘’Kơ’nêi hdrê vâ pro ăm ai hên ká xi xŏng kơpong kĭng têa kơxĭ Bắc bộ hơnăm 2022’’. Tiô tối hdrối kô ai lối 8 rơtuh to hdrê ká xi xŏng châ kơ’nêi tung roh lêh a Tuần Châu. Tơdroăng pêi kố ối tung tơdroăng pêi pro Mơ-éa chô vế ‘na po rơdâ pêi pro tơrŭm kơ’nêi hdrê ƀă rak vế ká xi xŏng tung kơpong kĭng têa Bắc bộ châ kĭ pơla Khu xiâm pơkuâ ‘na pêi chiâk deăng ƀă mơnhông mơdêk thôn pơlê Việt Nam ƀă Khu xiâm pơkuâ pêi chiâk kơpong rêh ối pêi chiâk deăng kong têa Sinuâ klăng roh lăm pôu pêi cheăng dêi pôa Nguyễn Phú Trọng troh a kong têa Sinuâ hơnăm 2017. Sap hơnăm 2017 troh nôkố, péa pâ hiăng tơrŭm tơkŭm po châ tơƀrê 4 xôh tơdroăng kơ’nêi hdrê ká xi xŏng tơdjuôm tung kĭng têa Bắc bộ.

A Sa Ly tơplôu ƀă tơbleăng