Hlê plĕng nhên hnoăng cheăng ki kal dêi kơpong tơnêi Tây Nguyên, ing hơnăm 1993, khu kăn pơkuâ ngăn Rơ’jíu Việt Nam hiăng pơkâ kô mơjiâng Kơ koan teăng mâ Rơ’jíu Việt Nam kơpong Tây Nguyên ki ai tíu pêi cheăng a Ƀuôn Ma Thuột, drêng mê nah, cho kong pơlê Dak Lak. Kố cho môi troăng hơlâ ki tơtro khât, prôk tiô troăng hơlâ, ti xê to tơdroăng ki mơhnŏng pêi pro dêi xêh tung po rơdâ vâ mơnhông ngiâ méa dêi Rơ’jíu xiâm Việt Nam, mê ối cho tơdroăng cheăng kal kí tung pơla kơpong tơnêi a Tây Nguyên dế prôk troh tơdroăng ki pơtối mơnhông rơtế ƀă tơnêi têa.

Pôa Lê Đình Đạo, Kăn xiâm phŏ hnê ngăn Rơ’jíu Việt Nam, cho kăn pơkuâ Kơ koan teăng mâ Rơ’jíu Việt Nam a kơpong Tây Nguyên ki apoăng, chôu vế tiah kố:

“Kơ koan teăng mâ Rơ’jíu Việt Nam a kơpong Tây Nguyên drêng mê nah ai tối, ‘na kuăn mơngế ki pro pơkuâ ai 3 troh 4 ngế kăn ƀô̆ ing Hà Nội troh mot akố. Ngin athế hôp, tơpui tơno, ƀă lăm tăng vâi o ki hiăng mơgêi hngêi trung Đăi hok Tây Nguyên, ƀă troh a mâu pơlê cheăm vâ lăm tăng mâu vâi o ki rơkê plĕng nâl kuăn ngo, vâ pêi hnoăng cheăng tơplôu tơbleăng, tơpui pơchuât nâl hdroâng kuăn ngo tơná.

Mâu kế tơmeăm kih thuât, xuân kơnôm ai tơdroăng ki veăng kum dêi mâu kơ koan a kơpong pơlê kong krâm Ƀuôn Ma Thuột drêng mê nah, mê ngin hiăng mung môi toăng hngêi ki hiăng ton, mơnât mĕn pro ƀă gât ki hbo 10cm, tôl lêm ƀă fibro xơmong, cho tíu ki vâ ăm nhŏng o rêh kâ ối, ƀă xuân cho tíu ki pêi cheăng”.

Ngoh Y Khem, Ngế cheăng hlá tơbeăng cho môi tung mâu ngế ki tơplôu tơbleăng, tơpui pơchuât nâl Rơđế ki apoăng dêi Kơ koan teăng mâ Rơ’jíu xiâm Việt Nam a kơpong Tây Nguyên. 30 hơnăm hdrối mê hía nah, mâu tơdroăng ki ối chôu vế mâu roh ki apoăng dêi VOV Tây Nguyên, tŭm tơdroăng xuân ối chôu vế mâu tơdroăng roh ton nah ‘na roh ki tơpui mơ’no apoăng dêi VOV Tây Nguyên ga xuân ối tơleăng nhên tiah mê.

“Xua ga, drêng mê nah, ôh tá ai kơmăi vi tĭnh tiah nôkố mê vêh hmâng mâu tơdroăng ki vâi ngoh nâ o pơchuât klêi mê, vâ pơtối vêh hmâng, bú ai to radio a hngêi vâ po ăm nôu pâ jâ poâ, kơdrâi kuăn tơmâng tê. Hmâng dêi rơkong tơpui tơná ga ti lâi. Tơdroăng kố cho hâk tơngăm ‘nâng”.

30 hơnăm hiăng luâ, mâu ngế ki chêh hlá tơbeăng VOV a Tây Nguyên hiăng chiâng mâu tơdroăng ki djâ troăng ahdrối tung hiâm tuăn dêi tơdroăng mơhno túa lĕm tro; pêi pro lĕm tro hnoăng cheăng tơná, tiô tơdroăng ki hlá tơbeăng kăch măng hiăng hnê tối: cho tíu ki djâ troăng tung hnê tối troăng pơkâ, troăng tơdjâ dêi Đảng, troăng hơlâ ƀă luât xiâm dêi tơnêi têa. Pơtroh ăm tơdroăng nếo ai ki rĕng ki tro, teăm tơdrêng. Pakĭng mê, hnối rĕng teăm hnê tối, tah lôi mâu tơdroăng ki hiăng mơhno pêi pro, mâu tơdroăng ki ôh tá ‘ló, tah lôi mâu tơdroăng ki vâ hliăng tăng pro tơdroăng ôh tá tơniăn, tíu chêh hlá tơbeăng veăng kum kal khât ăm tơdroăng ki mơnhông ăm Tây Nguyên.

Ai to lâi chât pri hlá tơbeăng tơnêi têa tung mâu hơnăm hiăng luâ, hiăng diâp ăm mâu ngế chêh hlá tơbeăng dêi VOV Tây Nguyên, mê cho tơdroăng ki vêh mơnhên tối ki tơxâng dêi Đảng ƀă Tơnêi têa ƀă mâu tơdroăng ki kơdo mơ-eăm dêi khu kăn ƀô̆ chêh hlá tơbeăng Kơ koan teăng mâ Rơ’jíu xiâm Việt Nam.

Vêh mơnhên tơdroăng ki veăng kum dêi Kơ koan teăng mâ Rơ’jíu Việt Nam a kơpong Tây Nguyên, Đảng, Tơnêi têa hiăng ai hên tơdroăng, môi tiah Mê dai Pêi cheăng ối má 3, má péa ƀă má môi a mâ hơnăm 2004, 2008 ƀă 2015; Hlá cơ tơ’noăng dêi Chin phuh hơnăm 2018. Vũ Hải Định, Kăn pơkuâ ngăn VOV Tây Nguyên tối tiah kố:

“Ngin hâk mơnê khât tung tơdroăng hơ’lêh nếo mâu tơdroăng ki xiâm dêi tơdroăng tơpui nâl kuăn ngo tro tiô mâu tơdroăng ki tơdjêp, tơkoh hên, achê ƀă hdroâng kuăn ngo. Ngin kơdo mơ-eăm ngăn khât tơdroăng ki chêh tối, êng tiâ, ki rơhêng vâ tối cho tơdroăng vêh mơnhên, tơpui leăng, la ai troăng pơkâ tiô troăng hơlâ ki nhên. Ngế chêh hlá tơbeăng ngin ôh tá la lâi klâi kho drêng lăm troh a kơpong ki xahpá; maluâ tung pơla ai pơreăng COVID tâ tá. Ki má péa nếo, ngin xúa kŏng ngê̆ kơxô̆, mơdêk tơdroăng ki pơkuâ ngăn ƀă xúa tơdroăng cheăng chêh hlá tơbeăng. Ai hên mâu tơdroăng ki hriăn plĕng ‘na khoa hok, ki rơkê plĕng nếo ‘na kih thuât hiăng châ xúa ki păng ‘nâng, tơniăn dâi lĕm khât”.

Mâu khu kăn pơkuâ hneăng hdrối mê hía nah, mâu ngế cheăng tung Kơ koan Rơ’jíu xiâm Việt Nam kơpong Tây Nguyên hiăng hâk tơngăm pêi pro tung hnoăng cheăng mơnhông mơdêk dêi VOV Tây Nguyên. Pôa Đỗ Tiến Sĩ, Ngế cheăng tung tíu xiâm Đảng tơnêi têa, Kăn xiâm pơkuâ Rơ’jíu Việt Nam tối tiah kố:

“Kơ koan teăng mâ Rơ’jíu a Tây Nguyên kô pơtối mơdêk tơdroăng tơrŭm cheăng, hloh hlê, rơkê plĕng, pêi cheăng tiô túa nếo; tơdjâk troh tơdroăng ki ai păng ‘nâng, tơdroăng ki rĕng tơtro tiô tơdroăng ki tơ’lêi. La tơdrêng amê, po mâu troăng hơlâ ki nếo vâ pin hnê mơhno tối, rak vế, pêi pro hnoăng cheăng hnê mơhno, maluâ cho troăng pơkâ, troăng tơdjâ dêi Đảng, tơnêi têa, mâu kong pơlê, pơlê kong kơdrâm tung kơpong Tây Nguyên ƀă mâu hdroâng kuăn ngo tối tơdjuôm, ki rơhêng vâ tối cho hdroâng kuăn ngo tối krê.

Vâ ing mê ah, ăm hlo tơdroăng ki tŏng kum ngăn khât dêi Đảng, Tơnêi têa, la tơdrêng amê, xuân hiăng hlo ki kơdo mơ-eăm dêi tơdroăng tơrŭm tung rơpŏng hngêi mâu hdroâng mơngế Việt Nam, châ mơnhên tối mâu troăng hơlâ tung kơpong Tây Nguyên. Tung la ngiâ, á loi tơngah tiah kố, kơ koan teăng mâ Rơ’jíu Việt Nam kơpong Tây Nguyên kô pơtối mơdêk hiâm tuăn loi tơngah vâ thăm mơdêk tơdroăng ki xiâm vâ pin mơjiâng khu ki chêh hlá tơbeăng rế hiá rế lĕm tro hên tâ. Pin hiăng ai khu ki veăng pêi cheăng vâ thăm mơdêk luâ tâ nếo ‘na tơdroăng nếo ai ing pơlê cheăm”.

Drêng koh tơbâ 30 hơnăm mơjiâng Kơ koan teăng mâ Rơ’jíu Việt Nam a Tây Nguyên cho hdró ki kal. Ing kơdró ki kố, mâu khu râ, kơvâ cheăng, mơngế chêh hlá tơbeăng, mâu ngế rah cêh ƀă mâu ngế ki pêi cheăng tung khu kô pơtối mơdêk chêng prôk dêi pâ pôa vâ mot dêi tung hnoăng cheăng tơdjuôm VOV mơ’no rơkong tơpui Việt Nam thăm rế chhâk hơngế luâ tâ kơ mê nếo.