VOV4.Xơ Đăng - Klăng leh tơbâ 97 hơnăm Hâi hlá tơbeăng Kăch măng Việt Nam, kơxo lơ 21/6, a pơlê kong kơdrâm Ƀuôn Ma Thuột, Hô̆i đong Pri hlá tơbeăng kong pơlê Dak Lak tơkŭm po ‘’Pri Hlá tơbeăng kong pơlê Dak Lak roh má 2 hơnăm 2021’’. Pri hlá tơbeăng kong pơlê Dak Lak hơnăm kố ai 155 ƀai chêh dêi mâu khu chêh hlá tơbeăng, ngế chêh hlá tơbeăng ối tung mâu kơ koan chêh hlá tơbeăng a kong pơlê ƀă Tơnêi têa ối pêi cheăng tung kong pơlê veăng tơ’noăng a mâu ƀai mơ’no tung Rơ’jíu, um tơvi, Hlá tơbeăng in, Hlá tơbeăng điê̆n tưh ƀă Um Hlá tơbeăng.

Khu châ kâ pri A  hlá tơbeăng Dak Lak

Hô̆i đong Hlá tơbeăng kong pơlê Dak Lak hiăng rah xo 52 ƀai ki hôm vâ diâp pri, ai 4 pri A, 8 pri B, 18 pri C ƀă mâu pri mơhnhôk. Pôa Nguyễn Văn Phú – Kăn hnê ngăn Khu chêh hlá tơbeăng kong pơlê Dak Lak – mơnhên, mâu ƀai chêh veăng tơ’noăng hơnăm kố pơrá cho hôm, pêng păm tơdroăng ki tiâ tối, chêh tối tro păng ‘nâng tơdroăng kal kí, cheăng kâ ƀă mơhno túa lĕm tro – rêh ối pơlê pơla a Dak Lak. Ki rơhêng vâ tối hơnăm kố VOV Tây Nguyên cho môi tung mâu kơ koan veăng tơ’noăng a hên tơdroăng chêh, ƀă châ 7 pri, tung mê ai 1 pri A, 1 pri B, 2 pri C.

            A Sa Ly tơplôu ƀă tơbleăng