30 hơnăm hiăng hluâ, mâu ngế chêh hlá tơbeăng VOV Tây Nguyên chiâng mâu ngế lêng djâ troăng a troăng tung Măt trâ̆n troăng tơmiât khôi túa lĕm tro; pêi lĕm tro kơvâ cheăng hlá tơbeăng kăch măng: cho ngế pơtâng tối troăng hơlâ, troăng prôk dêi Đảng, troăng hơlâ ƀă luât dêi tơnêi têa.

Tơbleăng tơdroăng rĕng – tơtro, teăm tơdrêng. Tơdrêng amê chêh tối, tiâ tối ai ivá mơhnhôk, mâu troăng tơmiât ôh tá tro, hdreăm hôu tŭm tơdroăng ki ‘nhê hơniâp lĕm, kum kal khât tung tơdroăng mơnhông dêi Tây Nguyên. Pôa Điểu Dũng ối a cheăm Dak Ndrung, tơring Dak Song, kong pơlê Dak Nông tối:

“Tơdroăng tơpui nâl M’Nông cho ro, kuăn pơlê hâk vâ tơmâng. Tơdroăng tơpui rế hía rế hên, tơdroăng kuăn pơlê pêi chiâk deăng hnê kuăn pơlê rak ngăn loăng plâi. Pơtâng tối ‘na troăng hơlâ dêi Đảng ƀă Tơnêi têa troh ƀă kuăn pơlê. Á pói vâ tơdroăng tơpui M’nông rak hyôh mâu tơdroăng tơpui hnê ‘na pơchân kuăn cháu hriâm tâp, kih thuât pêt kơphế... kuăn pơlê hâk vâ tơmâng’’.

Jâ Ka Lót, hdroâng kuăn ngo K’Ho Mạ, ối a cheăm Lộc Bắc, tơring Bảo Lâm, kong pơlê Lâm Đồng cho môi ngế hâk vâ tơmâng Rơ’jíu Việt Nam ƀă nâl K’Ho. Tơmâng mâu tơdroăng rơngê, ting ting nâl dêi jâ pôa tơná, jâ Ka Lót tâ rơrêk. Cho kăn ƀô̆ pêi cheăng tơnêi têa, jâ tâ hlo nhên hnoăng ki kal dêi nâl tơpui jâ pôa ôh tá xê to tung tơpui tơno tiah hmâ rêm hâi, mê tung tơdroăng cheăng rêm hâi.

Kơnôm đi đo tơmâng tơdroăng tơpui nâl K’Ho dêi Rơ’jíu Việt Nam mê jâ Ka Lót ti tăng plĕng tơ’nôm khôi túa lĕm tro dêi hdroâng kuăn ngo tơná.

“Á hâk vâ tơmâng mâu tơdroăng hơdruê long, hơdruê hdroâng kuăn ngo tơná, laga á tơpui tá hâi tŭm tâi tâng ƀă ôh tá chiâng hơdruê, rơngêi... á cho mơngế hâk vâ tơmâng rơ’jíu. Đảng, Tơnêi têa hiăng tơmâng djâ nâl tơpui hdroâng kuăn ngo K’Ho – Mạ mơ’no tung rơ’jíu á phiu ro ‘nâng’’.

Pôa Ha Hiếu, hdroâng kuăn ngo K’Ho, pêi cheăng a Tíu xiâm mơhno khôi túa lĕm tro ƀă Tơ’noăng ivá tơring Dam Rông, kong pơlê Lâm Đồng tối ăm ‘nâi, pôa rế pro ngế chêh hlá tơbeăng, ngế rah chêh hlá tơbeăng, ngế tơplôu ƀă tơpui tơdroăng tơpui nâl K’Ho. Pakĭng tơdroăng tơpui nâl K’Ho tung rơ’jíu, Um tơvi rơ’jíu  tơring ối tơdah dêi Rơ’jíu, um tơvi kong pơlê Lâm Đồng ƀă tơdroăng tơpui nâl K’Ho dêi Rơ’jíu Việt Nam xua kơ koan teăng mâ kơpong Tây Nguyên tơpui pơchuât. Kơnôm mê, kuăn pơlê mơngế K’Ho a tơring kơpong hơngế hơngo Dam Rông pơtối châ tơdah tơdroăng kal hên ƀă pơxúa.

“Hdrối nah a pêi cheăng a ƀơrô pơkuâ kăn ƀô̆, kơ’nâi mê pêi cheăng a ƀơrô hdroâng kuăn ngo. Troh mơ’nui hơnăm 2018 á pêi cheăng a Rơ’jíu um tơvi Dam Rông. Tơdroăng cheăng rêm hâi dêi á cho tơplôu ing nâl Xuăn chiâng nâl K’Ho. Kơ’nâi mê pơchuât ƀă nâl hdroâng kuăn ngo K’Ho. Mâu tơdroăng pơchuât a kố tơdjâk troh pêt mơjiâng tơmeăm, mơnhông pêt mơjiâng tơmeăm rơpŏng, tơdroăng rak vế kong prâi a thôn kơtâu, tơdroăng hriâm tâp dêi kuăn ‘nĕng a pơlê’’.

30 hơnăm hiăng hluâ, Kơ koan teăng mâ kơpong Tây Nguyên hiăng mơ-eăm vâ kêi đeăng hôm hnoăng cheăng. Ing tơdroăng chêh tối, pơtâng tŭm, teăm tơdrêng trâu hơngế, tro troăng mâu tơdroăng kal kí, cheăng kâ – rêh ối pơlê pơla, cheăng lêng tơkŭm po lâp kơpong troh mâu ngế ki tơmâng ngăn tung lâp tơnêi têa ƀă kong têa ê. Kơ koan teăng mâ kơpong Tây Nguyên hiăng kum hên ăm tơdroăng mơdêk châ tơƀrê ăm tơdroăng mơjiâng rŭm môi tuăn tâi tâng kuăn pơlê, ăm tơdroăng mơnhông dêi kơpong Tây Nguyên.