Tơpui a rôh leh, Ngế cheăng tung pơkuâ ngăn tíu xiâm Đảng, Kăn xiâm pơkuâ Rơ’jiu Việt Nam Đỗ Tiến Sỹ tối nhên, tung pơla 30 hơnăm, tâi tâng mâu kăn ƀô̆, mâu ngế cheăng dêi Kơvâ cheăng Hdroâng kuăn ngo hiăng ai hên ivá veăng kum kal khât tung tơdroăng ƀlêi chiâng tơdjuôm dêi lối 78 hơnăm Rơ’jiu Việt Nam ƀă thăm mơdêk tơ’nôm ki kơnía, ivá rơdêi dêi rơ’jiu dêi môi Kơ koan hlá tơbeăng, um tơvi, rơ’jiu ki xiâm, ai hên kơvâ cheăng troh hên hĭn kuăn pơlê ki tơmâng rơ’jiu tung tơnêi têa ƀă a kong têa ê.

Tung pơla hneăng ki nếo, athế mơdêk ‘mâi mơnhông krá rơdêi khô̆i tơrŭm tâi tâng hdroâng kuăn ngo, mơdêk ivá rơdêi, rơdêi tâ nếo ‘na hnoăng cheăng, tơdroăng ki veăng kum dêi mâu rơxông kuăn pơlê, po ƀă mơdêk mâu liăn ngân, ivá, tơdroăng ki rơkê plĕng dêi rêm ngế Việt Nam, po tơdroăng tơmiât rơhêng vâ mơnhông dêi tá hdroâng kuăn ngo. Drêng kố, Ƀâng hdroâng kuăn ngo hiăng châ Rơ’jiu Việt Nam, mâu Khu xiâm, kơvâ cheăng Tơnêi têa, kong pơlê diâp ƀâng khê̆n kơdeăn mâng xo mâu tơdroăng ki veăng kum kơhnâ, tơƀrê dêi kăn ƀô̆, ngế chêh hlá tơbeăng, ngế ki rah chêh drêng tơbâ 30 hơnăm mơjiâng.