VOV4.Sêdang - Cho tíu ki apoăng ai pơreăng hên má môi kong pơlê Dak Lak, ƀă 51 ngế F0, nôkố a ƀuôn Ea Bhôk, cheăm Ea Bhôk, tơring Čư̆ Kuin hiăng tơkâ luâ 25 hâi ôh tá hlo ai ngế ki lâi tâ pơreăng nếo. Tâi tâng F1 hiăng klêi hâi khế klâ ối krê ƀă hiăng ai 44 ngế tâ pơreăng châ lo ing hngêi pơkeăng pơlât. Tơdroăng rêh ối dêi kuăn pơlê ƀuôn Ea Bhôk dế rế hía rế vêh tiah hmâ nếo ƀă mâu tơdroăng cheăng.

Râng kât hlá alâi ăm ro nếo klêi kâ, pôa Y Doen Mlô, ối a ƀuôn Ea Bhôk, cheăm Ea Bhôk, tơring Čư Kuin, kong pơlê Dak Lak pơtối hbrâ lo lăm a klâng ngăn dêi báu. Mâu tơdroăng cheăng kố vêh ƀă pôa Y Doen Mlô châ 1 măng tĭng kố. Hdrối mê, a mơ’nui khế 7, rơpŏng pôa ai 9 ngế pơrá tro tâ pơreăng COVID-19; ai 2 on veăng pôa Y Doen Mlô rơtế 3 ngế kuăn ƀă 4 ngế cháu. Troh nôkố bu u ối kơdrâi pôa dế pơlât, 8 ngế ki ê tung rơpŏng hiăng pơlât prêi ƀă xuân hiăng klêi 14 hâi klâ kơtăn a hngêi klêi kơ’nâi lo ing hngêi pơkeăng.

‘’Vêh troh a hngêi tâ phiu ro, ivá á hiăng tơniăn tiah hmâ. Klâng, chiâk deăng, chu, ro xuân ai ngế tŏng kum, rak ngăn ăm, á hiăng vêh a hngêi mê á tâ phiu ro, klâng báu hiăng siu á xuân mơnê hên’’.

Jâ H’Noen Ksor rơtế kuăn cháu pôe báu

Xuân môi tiah pôa Y Doen Mlô, jâ H’Noen Ksor chiâng ngế tro tâ COVID-19 a hâi lơ 22/7 drêng ối achê ƀă nhŏng o cho F0 tung pơlê. 5 ngế ki ê tung rơpŏng dêi jâ chiâng F1 ƀă thế klâ kơtăn tơkŭm 21 hâi. Vêh tơdroăng rêh ối tiah hmâ klêi kơ’nâi 1 khế tơdế pơlât ƀă klâ kơtăn xua COVID-19, jâ H’Noen Ksor plĕng nhên ‘na ki kơnía dêi tơdroăng rêh ối ƀă hlê plĕng hên tâ tung tơdroăng hbrâ mơdât pơreăng:

‘’Ƀok thái pơkeăng pơchân drêng vêh a hngêi, ôh tá chiâng lăm ulâi bu ối tung hngêi tê, ôh tá chiâng trâm mâ ối achê ƀă kơbố ôh, tá kuăn ‘nĕng tung hngêi, klâ kơtăn xêh, hmê kơchâi kâ, têa ôu kuăn cháu tung rơpŏng pế klêi mê djâ ăm á, to lâi hâi kơ’nâi drêng vêh a hngêi xuân châ ƀok thái pơkeăng troh lăm khăm pơlât. Nôkố mê hiăng mo lĕm, vâi ăm lăm a cheăm xo mơ-éa châ ăm phêp prôk lăm, lăm a chiâk deăng. Nôkố nếo khên lo pa gong vâ pro mơ-éa, mê sap ing hdrối nah á ôh tá khên lăm u lâi. Nôkố tâ hiăng mo hên. Á pâ mơnê troh mâu ƀok thái pơkeăng hiăng kơhnâ pơlât ăm á’’.

Pôa Y Doen Mlô vêh tơniăn tơdroăng rêh ối rêm hâi klêi kơ’nâi pơlât pơreăng COVID-19

Pôa Đào Huy Cường, kăn pơkuâ ƀuôn Ea Bhok tối ăm ‘nâi, hâi lơ 19/7, drêng pơlê châ hlo ngế tro tâ pơreăng apoăng cho kuăn pơlê tung pơlê vêh ing kong pơlê Bình Dương, bu klêi kơ’nâi 3 hâi, kơxô̆ mơngế tro tâ pơreăng hiăng tâk 36 ngế; ƀă kơ’nâi 10 hâi, lâp pơlê châ hlo 51 ngế. 70 rơpŏng tro tơdjâk xua ai ngế tung rơpŏng cho F0 ƀă F1. Vâ hbrâ mơdât pơreăng COVID-19, hên troăng pêi kơtăng châ khu râ kăn pơkuâ cheăm pêi pro môi tiah: kâng kơxái ôh tá ăm mot lo lâp ƀuôn Ea Bhôk, pêi pro pơkâ 16 tung lâp cheăm. Rơtế ƀă mê, tơdroăng kuăn pơlê rêh ối xuân châ tŏng kum teăm tơdrêng, tơniăn ôh tá ai rơpŏng ki lâi kơklêa, rơpŏng ki lâi ôh tá bê kế kâ tung pơla pơlê pêi pro mơdât ôh tá ăm mot lo pa gong vâ mơdât pơreăng.

Tơdroăng rêh ối tiah hmâ a ƀuôn Ea Bhôk

Tiô pôa Đào Huy Cường, kăn pơkuâ ƀuôn Ea Bhok, kơnôm tơdroăng môi tuăn dêi kuăn pơlê, tơdroăng pêi kơtăng dêi khu râ kăn pơkuâ cheăm, troh nôkố, ƀuôn Bhôk hiăng tơkâ hluâ 25 hâi ôh tá ai ngế nếo tro tâ pơreăng, 44 ngế tro tâ COVID-19 hiăng châ lo ing hngêi pơkeăng ƀă kêi đeăng hâi khế klâ kơtăn klêi kơ’nâi pơlât. Mâu tíu kâng kơxái mơdât ôh tá ăm mot lo hbrâ mơdât pơreăng xuân hiăng châ tah lôi, tơdroăng rêh ối dêi kuăn pơlê hiăng chôa ‘lâng vêh tơniăn tiah hmâ.

‘’Nôkố pơxiâm tơdroăng rêh ối pơtân vêh tơniăn hiăng châ tơdah tơbleăng dêi Khu mơhnhôk pêi chiâk deăng cheăm ‘na tơdroăng tŏng ăm vâi krâ mâu kih thuât mơdât pơreăng ăm loăng plâi kâ klêi kơ’nâi môi pơla á ôh tá châ lăm ngăn. Ai môi kơtâ hnê mơhno nhên rêm tuá pơkeăng xế báu, kơphế, tiu vâ vâi krâ mơ-eăm pêi kâ châ hên tơmeăm má môi vâ ví tro lu\p ăm vâi krâ’’.

Pôa Nguyễn Văn Dũng, Kăn hnê ngăn Vi ƀan cheăm Ea Bhôk, tơring Čư Kuin, kong pơlê Dak Lak tối ăm ‘nâi: rơtế ƀă tơdroăng tŏng kum vâi krâ hbrâ mơdât pơreăng, mơnhông pêi kâ, pêi chiâk deăng tung pơla pơlê tro kâng kơxái mơdât ôh tá ăm mot lo tung pơlê, khu râ kăn cheăm xuân kơbông krếo mâu khu ki tŏng kum mơngế pá puât diâp ăm tơmeăm kâ ăm mâu rơpŏng kơtiê, rơpŏng tro tơdjâk xua COVID-19 vâ vâi rĕng tơniăn tơdroăng rêh ối. Mâu troăng hơlâ tŏng kum châ cheăm pêi pro teăm tơdrêng:

‘’Cheăm xuân hiăng tơbleăng pâ Khu râ kăn pơkuâ cheăng Đảng tơring, Vi ƀan tŏng kum rêm ngế F0 môi tiah mê cho 10 kilô phái, F1 cheăm cho 5 kilô. Mâu ngế pêi cheăng ki hmâng vâ vêh a pơlê mê cheăm dế pêi pro Pơkâ 68 vâ tŏng kum vâi krâ teăm tơdrêng vâ ai liăn vâ vâi krâ pơtối pêi kâ a pơlê ƀă pơtối pơtâng tối ăm vâi krâ ôh tá tơngôu, pêi pro tơtro pơkâ 5K dêi Khu xiâm ngăn pơkeăng ƀă khăm pơlât’’.

Ing môi tíu pơreăng COVID-19 ki hên má môi dêi kong pơlê Dak Lak, khu râ kăn pơkuâ ƀă kơvâ cheăng pêi pro mâu troăng pêi mơdât pơreăng kơtăng, teăm tơdrêng, troh nôkố tơdroăng rêh ối dêi kuăn pơlê a ƀuôn Ea Bhôk, cheăm Ea Bhôk, tơring Čư Kuin dế choâ ‘lâng tơniăn lĕm. Laga, drêng ai pơreăng COVID-19 pơtối xông tâ tú ó, vâi krâ ôh tá chiâng tơngôu; mê thế pêi tiô mâu pơkâ hbrâ mơdât pơreăng.

Nam Trang - VOV Tây Nguyên chêh

A Sa Ly tơplôu ƀă tơbleăng